XFS Oo ka warbixisay dab ka kacay Garoonka Muqdisho

[Deeq A.]

Muqdisho ( Sh. M. Network )-Wasiirka Gaadiidka iyo Duulista Hawada ee Soomaaliya Maxamed C/laahi Oomaar oo la hadlay Warbaahinta ayaa ka warbixiyay dab xoogan oo saaka aroortii hore ka kacay Garoonka diyaaradaha Aadan Cadde ee magaalada Muqdisho.

Wasiir Oomaar ayaa sheegay in dabka uu ka dhashay Koronto, kaas oo qabsaday Maqaayad ku taalla gudaha Garoonka caalamiga ah ee magaalada Muqdisho.

Waxaana uu tilmaamay in wax khasaare ah uusan geysan dabkaasi, marka laga reebo jiko yar oo ay korontadu wax gaarsiisay

“Maanta subaxii saacaduna aheyd 05:30 ayaa koronto sababtay qaac inuu galo gudaha dhismaha garoonka muqdisho, haba yaraatee wax gaaray garoonka, qalabka iyo naf ma jiraan marka laga reebo jiko yar oo ay korantada wax gaarsiisay” ayuu yiri Wasiir Omaar.

Sidoo kale waxa uu intaasi ku daray Wasiirka Gaadiidka iyo Duulista Hawada ee Soomaaliya in shaqaddii Garoonka ay socoto, islamarkaana  uu wax saameyn ah ku yeelan dabkaasi.

“Garoonka waa uu shaqaynayaa si caadi ah Duulimaadyaduna si habsami leh ayey u socdaan” ayuu yiri mar kale Wasiir Omaar.

Dhinaca kale waxaa lagu guuleystay in la demiyo dab qabsaday qeyb ka mid keydka hadalka Radio Muqdisho (Codka Jamhuuriyadda Soomaaliya) oo ku yaala xarunta Wasaaradda Warfaafinta, iyadoo dabkaasina uu ka dhashay koronto saacadu marka ay aheyd 10-kii barqanimo.

Maamulka Gobolka Banaadir ayaa qeyb weyn ka qaatay daminta dabka oo soo diray Gaadiidka iyo Kooxda dab damiska,kuwaasi oo suurtagal ka dhigay in si deg deg ah dabka loo damiyo.

Khasaaraha ka dashay dabka ma badna, waxaana Maamulka iyo Shaqaalaha Wasaaradda Warfaafinta ay ku howlan yihiin tirakoobka cajaladaha gubtay.

Mas’uuliyiinta Wasaaradda Warfaafinta Xukuumadda Soomaaliya ayaa u mahad celiyay shaqaallaha dab damiska gobolka Benaadir iyo shaqaallaha Wasaaradda Warfaafinta oo iyagu aan ukala harin daminta dabka iyo daad gureynta cajaladaha ku keydsan keydka hadalka Radio Muqdisho.

The post XFS Oo ka warbixisay dab ka kacay Garoonka Muqdisho appeared first on Shabelle.

View the full article