Dad ay ku jiraan 3 walaalo ah oo aano qabiil loogu laayey duleedka Muqdisho

[Deeq A.]

Afgooye (Caasimada Online) – War hadda nasoo gaaray ayaa sheegaya in lix qof oo rayid ah lagu dilay deegaanka Lafoole ee gobolka Shabeellada Hoose, kuna yaalla duleedka magaalada Muqdisho.

Dad ku sugan Lafoole ayaa Caasimada Online u sheegay in lixdan qof lagala degay gaariga ay saarnaayeen oo ahaa nooca raaxada.

Koox hubeesan, oo wejiga duubtay ayaa la sheegay inay joojiyeen gaariiga ay saarnaayeen lixda qof oo dhammaantood rag ahaa, kadibna kala degeen oo ay wada toogteen.

Ilo-wareedyo lagu kalsoon yahay ayaa Caasimada Online u sheegay in dhacdadan ay la xiriirto aano qabiil oo u dhaxeysa laba beel oo wada dega Shabeellada Hoose, oo maalmahan dad iska dilayey.

Warar aan la xaqiijin ayaa sheegaya in saddex ka mid ah ragga la dilay ay ahaayeen walaalo.

Dadkii dhacdadan ku geeriyooday, ayaa sida ay wararka sheegayaa, dib loogu celiyay degmada Afgooye.

Wararka arrintan la xiriira ayaa isa soo taraya, naga filo faah-faahin dhowaan Insha allah.

Caasimada Online
Xafiiska Muqdisho
Caasimada@live.com