C/kariin Guuled oo si caro leh uga jawaabay eedeymo uu usoo jeediyay C/weli Gaas

[Deeq A.]

Muqdisho (Caasimada Online)-Hogaamiyaha maamulka Puntland Cabdi Wali Maxamed Cali Gaas oo ka hadlaayay maanta kulanka Garoowe uga furmay madaxda maamul goboleedyada ayaa soo hadal qaaday colaadihii ka jiray magaalada Gaalkacyo.

C/weli Gaas, waxa uu sheegay in colaadahasi uu ka danbeeyay Hogaamiyihii hore ee Galmudug  wuxuna ku eedeeyay maamulki hore ee Galmudug Cabdikariin Xuseen Guuleed.

C/weli Gaas, waxa uu sheegay in maamulkii Cabdikariin Xuseen Guuleed uu ahaa mid hogaaminayay colaada magaalada Gaalkacyo isagoo ku eedeeyay inuu ka dhaga fureysan jiray baaqyada nabadeed, sida uu Gaas yiri.

Cabdikariin Xuseen Guuleed, oo u waramayay Idaacada Knn ee magaalada Muqdisho ayaa sheegay in Gaas uu ka been sheegay xaqiiqda waxa uuna taa bedelkeeda carabaabay in maamulkiisii hore uu ahaa kan keliya ee u istaagay degnaanshaha Gaalkacyo.

Cabdikariin Xuseen Guuleed, waxa uu tilmaamay in dadaalkii ugu xooga badnaa uu galin jiray xalinta colaadii ka jirtay Gaalkacyo, isagoo marqaati ka dhigtay dhamaan dhinacyadii xiligaa kasoo qeybqaatay ama korjoogto ka ahaa shirarkii lagu xalin jiray colaada.

Cabdikariin Xuseen Guuleed, waxa uu sheegay in dhibaatada ugu badan ee colaada Gaalkacyo ay aheyd mid ka taagneyd dhanka Puntland waxa uuna muujiyay in C/weli Gaas uu ka meermeeri jiray xalinta colaadaha.

Cabdikariin Xuseen Guuleed, waxa uu carab ***** in C/weli Gaas uu madaxda Qaranka iyo kuwa shisheeye uu ka diidi jiray xalinta colaadaha Gaalkacyo balse uu keliya ka qaadan jiray Sarkaalka Ethiopia u joogay Somalia ee Gen. Gebra.

Sidoo kale, Guuleed ayaa C/weli Gaas ku eedeeyay inuu yahay mid aad xushmad u siiya shisheeyaha waxa uuna cadeeyay in talaabo waliba uu qaadayo ay tahay mid uu mudnaan kusiiyo shisheeyaha.

Haddalka Guuleed, ayaa kusoo beegmaya xili Siyaasad ahaan ay aad isugu dhow yihiin Hogaamiyayaasha Puntland iyo Galmudug.

Caasimada Online

Xafiiska Muqdisho

Caasimada@live.com