NISA oo baahisay inay gacan ku dhigtay xubin halisa oo ka tirsanaa Xagjiriinta Somalia ee Al-Shabaab

[Deeq A.]

Muqdisho (Caasimada Online)-War qoraala oo ka soo baxay Hay’adda Sirdoonka Somalia ayaa waxaa lagu sheegay in ciidamada sida gaarka ah u tababaran ee Hay’addu ay gacanta ku dhigeen Xubin muhiima oo ka tirsan xagjiriinta Somalia ee Al-Shabaab.

Hay’addu waxa ay qoraalkeeda ku sheegtay in dhagarqabaha la qabtay uu sahminaayay agagaarka Degmada Afgooye ee Gobolka Sh/Hoose, gaar ahaan goobo ay ka howlgalaan ciidamada amaanka.

Dhagarqabaha gacanta lagu dhigay ayaa la sheegay in si toosa uu ula socon jiray dhaqdhaqaaqa ciidamada halkaa ka howlgala, hase yeeshee dabagal dheer kadib gacanta lagu dhigay.

Qoraal lasoo dhigay Barta Twitter-ka ee NISA ayaa waxaa lagu sheegay in ninka la qabtay uu si gaara u sahmin jiray ciidamada ay xagjiriinta u galaan waddooyinka.

Waxa ay sidoo kale, Hay’addu sheegtay in howlgalka Ninkaasi lagu soo qabtay aysan cidna waxba ku noqon,isla markaana uu u dhacay sidii loogu talo galay.

Dhinaca kale, Hay’adda NISA ayaan si rasmi ah u shaacin magaca ninkaas, waxaana xusid mudan in Hay’addu bilihii lasoo dhaafay ay si rasmi ah u baahineysay Al-Shabaabka lasoo qabto.

Caasimada Online

Xafiiska Muqdisho

Caasimada@live.com