Diyaarado duqeyn ka geystay goob uu ka shidnaa Dab & Khasaaro xoogan oo ka dhashay

[Deeq A.]

Kismaayo (Caasimada Online)-Wararka naga soo gaaraya gobolka Jubbada Hoose ayaa sheegaya in diyaarado dagaal ay xalay duqeeyen degaanka Buula Xaajo oo ku yaalla duleedka magaalada Kismaayo ee xarunta gobolka Jubbada Hoose.

Wararku waxa ay sheegayaan in Diyaaradaha ay dhawr gantaal la heleen goob ay ku sugnaayen dad shacab ah oo uu ka daarnaa Dab.

Duqeynta ayaa waxaa ka dhashay khasaare kala duwan oo soo gaaray dadkaasi, kuwaa oo la sheegay in lagu khaldan Al-Shabaab.

Waxaa la sheegay in duqeyntan ay ku geeriyoodeen ilaa Saddex wiil oo dhalinyaro ah, halka mid kale uu  ku dhaawacmay duqeyntan dhaawiciisa gaari Dameer loogu qaaday magaalada Kismaayo.

Sidoo kale, Goobta ay diyaaradahan duqeynta la heleen ayaa waxaa la sheegay in aysan ku sugneyn xubno ka tirsan Al Shabaab, keliya dad shacab ah lagu waxyeeleeyay.

Dhinaca kale, waxan jirin ilaa hadda cid sheegatay mas’uuliyadda duqeyntan, hase yeeshee maalmihii la soo dhaafay diyaaradaha Mareykanka ayaa kordhiyay duqeymaha ay ka fulinayaan gobolada Jubbooyinka.

Caasimada Online

Xafiiska Kismaayo

Caasimada@live.com