Xog: Kenya oo sharciga kala noqotay soona masaafurisay wiilka Fahad Yaasiin

[Deeq A.]

Nairobi (Caasimada Online) – Dowladda Kenya ayaa sharciga dalkaas ee baasaboorka iyo kaarka aqoonsigaba kala noqotay wiil uu dhalay agaasime ku xigeenka hay’adda sirdoonka Soomaaliya Fahad Yaasiin Xaaji Daahir, sida ay sheegeen ilo-wareedyo lagu kalsoon yahay.

Wiilka sharciga lagala noqday oo lagu magacaabo Camaar Fahad Yaasiin, islamarkaana ah 23 jir ayaa waxaa la sheegay in sharciga uu ku waayey kiiska aabihiis, oo dowladda Kenya ay ku hayso baaritaan la xiriira inuu sharciga ku helay si aan sax ahayn.

Fahad ayaa lagu tuhmayaa inuu haysto laba baasaboor oo Kenyan ah oo qaab sharci-darro ah uu ku helay, islamarkaana ay ku qoran yihiin taariikho dhalasho oo is-khilaafsan, islamarkaana khilaafsan kuwiisa Soomaaliya.

21-kii August, wargeyska caanka ah ee Daily Nation ee Nairobi ayaa qoray in Fahad Yaasiin, oo adeegsanaya magaca Ahmed Fahad Daahir uu haysto basaboorka Kenya ee lambarkiisu yahay C024542 iyo kaarka aqoonsiga ama kibaandhaha ee lambarkiisu yahay 22847167, kuwaas oo hadda la baarayo sida uu ku helay.

Sida dad arrintan la socda oo codsaday inaan la magacaabin ay sheegeen, Camaar ayaa laba toddobaad ka hor ay dowladda Kenya kasoo masaafurisay Nairobi, waxaana laga soo dejiyey magaalada Muqdisho. Laba maalmood kadib ayaa la sheegay inuu dalka Cumaan ku aaday baasbaoor deg deg loogu sameeyey oo Soomaali ah. Camaar ayaa halkaas ka dhigta Jaamacad.

Warar kale ayaa sheegaya in sidoo kale xubno kale oo ka mid ah qoyska Fahad ay dowladda Kenya kala noqotay sharciga, hase yeeshee lama xaqiijin karo.

10-kii bishan, Caasimada Online ayaa qortay in safaaradda Soomaaliya ee magaalada Nairobi ay isku dayayso inay bad-baadiso ku xigeenka agaasimaha hay’adda sirdoonka Soomaaliya ee NISA, Fahad Yaasiin Xaaji Daahir oo waaxda socdaalka Kenya ay baaritaan ku hayso. Halkan ka aqri warbixintaas.

Caasimada Online
Xafiiska Muqdisho
caasimada@live.com