Xildhibaan C/llaahi Nuur: Waxaan aqaan dadka DF ah ee hubka siiya Shabaab

[Deeq A.]

Muqdisho (Caasimada Online) – Xildhibaanada baarlamaanka Somalia ayaa dhaliilo kala duwan ka muujinaya amni darada ka jirta magaalada Muqdisho ee caasimada Somalia.

Xildhibaanada ayaa dowlada Somalia ku eedeeyay inay ka gaabineyso amni kusoo dabaalida magaalada Muqdisho, sida ay hadalka u dhigeen.

Wasiiru dowlihii hore ee Maaliyadda Somalia ahna Xildhibaan ka tirsan baarlamaanka Somalia Cabdullaahi Maxamed Nuur, ayaa kamid ahaa mudanayaasha dhaliilaha amni usoo jeediyay dowlada Somalia, waxa uuna tilmaamay in lagu fashilmay amniga.

Xildhibaan Cabdullaahi Maxamed Nuur ayaa sheegay in amnidarada dalka ka jirta ay sabab u tahay hubka ay maleeshiyaadka Al-Shabaab ka helan dowladda.

Nuqul kamid ah haddalkiisa ayaa ahaa “Waanu la socnaa mas’uuliyiin ka tirsan Dowladda ayaa saanad Millateri u gudbiya Al-Shabaab,amnigana mahagaagaayo,dowladdan markii ay timid waxaa naga geeriyooday in ka badan 400,000”

Xildhibaan Cabdullaahi Maxamed Nuur, waxa uu tilmaamay inay garanayaan shaqsiyaadka sida gaarka ah Hubka dowlada ula wadaaga Al-Shabaab, hase yeeshee waxa uu ku celcelshay in amniga Somalia, gaar ahaan kan Muqdisho uu kasii liidan doono inta uu hadda yahay, sida uu hadalka u dhigay.

Dowlada Somalia ayuu sheegay inay ka doonayaan in banaanka ay soo dhigaan shaqsiyaadka Hubka Qaranka la wadaaga Al-Shabaab, isagoo cod dheer ku sheegay inaysan ka ganban doonin xaqiiqda.

Sidoo kale, Cabdullaahi Maxamed Nuur, ayaa sheegay in dowlada ay kula xisaabtami doonaan askari waliba oo sababsada daryeel la’aan iyo saanad xumi kasoo foodsaarta dhanka dowlada, isagoo ka digay in la dhaliilsado qeyla dhaanta Xildhibaanada.

Haddalka Cabdullaahi Maxamed Nuur, ayaa u muuqanaya mid ay xildhibaanada uga faa’iideysanayaan makaroofanka maadaama kuwa hadlay ay u badan yihiin mucaradka.

Caasimada Online

Xafiiska Muqdisho

Caasimada@live.com