Guddiga doorashadda Gudoomiyaha Baarlamaanka Galmudug oo la magacaabay

[Deeq A.]

Dhuusa Mareeb (Caasimadda Online) – Waxaa Maanta Magaalada Dhuusamareeb ee Xarunta Gobolka Galgaduud kulan ku yeeshay Xildhibaano ka tirsan Baarlamaanka Maamulkaas.

Kulanka ayaa marka hore waxa ay Xildhibaanada uga doodeen mooshinkii ay ka keeneen Madaxweyne ku xigeenka Galmudug,iyaga oo halkaasi ku soo bandhigay waxyaabaha ay ku eedeynayaan.

Maalinta Berri ah ayaa lagu wadaa in Magaalada Dhuusamareeb lagaga dhawaaqo Codka kalsoonida kala noqoshadda Madaxweyne ku xigeenka maamulka Galmudug.

Gudoomiye ku xigeenka Koowaad Baarlamaanka maamulka Galmudug Xareed Cali Xareed  ayaa sidoo kale ku dhawaaqay Guddiga doorashadda Gudoomiyaha baarlamaanka maamulka Galmudug, Maadaama xilkii horay looga qaaday Gudoomiyihii Baarlamaanka maamulka Galmudug Cali Gacal Casir.

Guddiga doorashooyinka oo ka kooban 11 xubnood ayaa soo diyaarin doona qaabka ay u dhaceysa doorashada Guddoomiyaha Baarlamaanka Maamulka Galmudug.

Xaaladda Galmudugy ayaa noqotay mid cakiran waxaana laga yaabaa inay yeelato laba madaxweyne iyo Labo Guddoomiye Baarlamaanka marka loo fiiriyo sida uu hadda xaalku yahay.

Dowladda Soomaaliya ayaan weli ka hadlin xiisadda Galmudug inkastoo dadka qaar aaminsan yihiin inay dowladda qeyb ka tahay oo ay la safan tahay garab ka mid ah kuwa isku haayo Maamulka.

Caasimada Online

Xafiiska Dhuusamareeb

Caasimada@live.com