Gudoomiyaha Gaarisa oo xabsi la dhigay iyo arrin halisa oo lagu eedeeyay

[Deeq A.]

Nairobi (Caasimada Online) – Sida ay baahiyeen Wargeysyada kasoo baxa dalka Kenya ciidamada amaanka dalkaasi ayaa Xabsi dhigay Guddoomiyaha Magaalada Gaarisa Cali Bunoow Qorane.

Ciidamada oo ku hubeysnaa gaadiid ayaa Guddoomiyaha kala soo baxay hooygiisa, waxana xariga Guddoomiye Cali Bunoow lala xiriirinayaa toogasho dhawaan loo geystay madaxii hore ee Maaliyadda Gaarisa oo lagu dhaawacay Nairobi.

Wargeyska The Star ayaa qoray in Guddoomiye Cali Bunoow ay su’aalo weydiinayaan ciidamada Booliska oo la xiriiriyay toogashada madaxii hore ee Maaliyadda Gaarisa.

Booliska ayaa la sheegay in Guddoomiyaha ay la yeelan doonaan wareysi lagu weydiinayo su’aal si wax looga ogaado haddii uu waxbadan kala socday toogashada.

Booliska ayaa sheegay in Guddoomiye Cali Bunow iyo laba xubnoo oo loo heysto inay qeyb ka ahaayen dilka ayaa iminka lagu hayaa Xabsiga Booliska ee  Kilimani.

Ninka la toogtay oo lagu magacaabayay Idiris ayey toogashadiisu dhacday xili uu ku sugnaa suuqa Kileleshwa, ee Magaalada Nairobi,waxaana kuwa toogashada u geystay ay uga tageen Mayd ahaan.

Si kastaba ha ahaatee, Guddoomiyaha Magaalada Gaarisa Cali Bunoow Qorane ayaa waxaa horay loogu eedeeyay inuu ka danbeeyay shirqoolo kale oo ka dhacay Magaalada Gaarisa.

Caasimada Online

Xafiiska Nairobi

Caasimada@live.com