Sidee ayey HRW u aragtaa xariga Madaxweynihii hore ee DDSI Cabdi Cumar?

[Deeq A.]

Muqdisho (Caasimada Online)-Qoraal ay soo saartay Hay’adda Human Rights Watch ayaa waxaa lagu taageeray xariga Madaxweynihii hore ee DDSI Cabdi Maxamuud Cumar oo shalay la xiray.

Hay’adda ayaa sheegtay in Madaxweynihii hore ee DDSI uu galay danbiyo ka dhan ah xuquuqda aadamiga isla markaana ay muhiim tahay in lagu sameeyo baaritaan dheer.

Warbixin ay soo saartay Hay’adda u dooda xuquuqda aadanaha ee Human Rights Watch bishii July ee sanadkan ayaa lagu muujiyay falalka lidiga  ku ah xuquuqda aadamiga ee uu geystay Cabdi Cumar.

Warbixinta oo ka koobneyd 88 bog ayaa lagu xariiqay tacadiyo kala duwan oo ay ku eedeysay Cabdi Maxamuud, kuwaa oo ay fuliyeen ciidamada Booliska DDSI ee loo yaqaano Liyuu ay ka geysteen Jeel ogaadeeniya.

Human Rights Watch, ayaa Ra’isul wasaaraha Ethiopia Abiy Axmed ugu baaqday in baaritaano dheer lagu sameeyo Cabdi Cumar.

Sidoo kale, Ra’i’sul wasaaraha cusub ee dalka Ethiopia Abiy Ahmed Ali ayaa horay u qiray in mas’uuliyiintii hore ee DDSI ay geesteen tacadiyo badan oo xad dhaaf ah.

Si kastaba ha ahaatee, Cabdi Cumar oo shalay loo gudbiyay Xabsiga ayaa loo aaneynayaa inuu geystay dilal, xarig iyo boob.

Caasimada Online

Xafiiska Muqdisho

Caasimada@live.com