Saadaq Joon & ciidankiisa oo xoog ku degay godka Jilacow & muran ka taagan

[Deeq A.]

Muqdisho (Caasimada Online) – Taliyihii hore ee ciidamada nabadsugida gobolka Banaadir Saadaq Joon iyo ciidamo uu wato ayaa fadhiisin ka smeystay xaruntii hore ee “Godka Jilacoow”, waxaana ka dhashay muran iyo isqabqabsi sababta fasax la’aanta uu Saadaq Joon u degay halkas.

Warku wuxuu intaa ku darayaa in Saadaq Joon oo xilkii taliyenimo laga qaaday ayaa ciidamadii uu watay u geliyay dareeska ciidamada booliska, gaadiidkii tiknikadana wuxuu ku buufiyay calaamada booliska, tallaabadaasi oo taliyeyaasha ciidamada booliska su’aal geliyay ayaa, sababta ciidamadaasi oo horay ugu tirsanaa nabadsugida u adeegsadeen dareeska booliska.

Saraakiisha booliska, nabadsugida, milateriga iyo wasiirka amniga ayaa si wada jir ah u dalbadeen in ciidamadaasi uu hogggaaminaayo Saadaq Joon ka guuraan xarunta Godka Jilacoow oo maxaabiista nabadsugida ku xiraan, hase ahaatee dalabkaasi wuu kasoo horjeestay Saadaq Joon.

Amaro kasoo baxay madaxweynaha ayaa dhawaan lagu kala diray ciidamadii xasilinta oo qeyb ka ahaayeen kuwa Saadaq Joon, qeybihii kalena xarumahooda lagu kala celiyay, halka kuwa Saadaq Joon ay diideen inay magaalada ka banaan.

Warar madaxbannaan ayaa sheegaya in Saadaq Joon uu taageero ka helaayo xafiiska ra’iisul wasaaraha iyo dhowr wasiiro ah, sidaasina uu ugu madax adeegay inuusan ka guurin xarunta Godka Jilacoow.

Waxaa socda dadaal lagu doonayo in si nab’doon looga raro ciidamadaasi loona dejiyo xarumo loogu talagalay.