Madaxweynaha cusub ee DDSI oo sheegay sida uu arko xariga CABDI ILEY

[Deeq A.]

Addis-Ababa (Caasimada Online) – Saacado kadib markii Ciidamada Federaalka Itoobiya ay xabsiga dhigeyn Madaxweynihii hore ee dowlad deegaanka Soomaalida Itoobiya Cabdi Maxamuud Cumar ayaa waxaa xarigaas ka hadlay Madaxweynaha Cusub ee DDSI Mustaf Muxumed Cumar (Cagjar)

Qoraal kooban oo uu Madaxweyne Mustafe Cagjar  uu soo dhigay bartiisa Facebook, ayuu ku  sheegay inuu ka xun yahay in Madaxweyne la xiro, balse mudankiisa ay sidaas tahay, maadaama dhibaatooyin xoogan uu geystay.

“Aniga kuma faraxsani in la xiro Cabdi iley isaga oo bahdilan in kasta oo uu dambi badan galay laakin dad badan ayay u tahay Cashar iyo ku dayasho ayuu sii raaciyey hadalkiisa.

Sawirro laga soo qaaday Cabdi Maxamuud Cumar ayaa muujinayaya, isaga oo aad u labisan in Ciidamada Federaalka Itoobiya ay kala soo baxeen guriga uu ka deganaaa Magalada Adis Ababa sidaasina lagu xiray.

Sida ay faafisay wakaalada wararka ee Itoobiya ee FANA, xeer illaaliyaha guud ee Itoobiya ayaa sheegay in loo haysto dacwado la xiriira gabood falo ka dhan ah xuquuqda aadanaha iyo ku tagri fal awoodeed.

Lama oga caddeymaha xeer illaalinta ay maxkamadda horkeeni doonto, iyo goorta maxkamadda la hor geyn doono.

Hase yeeshee Ra’isulwasaaraha Itoobiya Abiy Axmed oo shalay ka hadlayay shir jaraa’id ayaa sheegay in arrinka Cabdi Maxamuud Cumar uu mari doono dariiqa saxda ah ee garsoorka, helina doono maxkamadayn caddaalad ah.

Hase yeeshee wuxuu Cabdi noqonayaa qofkii ugu sareeyay oo lasoo xiro, maxkamadna lasoo taago marka laga hadlayo dadka kala duwan ee guud ahaan Itoobiya lagu eedeynayo xad gudubyada ka dhanka ah xuquuqda aadanaha.