Xog: Imaaraadka Carabta oo dhaqaale ku bixinaaya CC iyo Gaas oo walaacsan

[Deeq A.]

Garoowe (Caasimada Online) – Waxaa lagu wadaa in Ra’isul wasaarihii hore ee Somalia CCC Sharmaarke uu kamid noqdo musharaxiinta u tartami doonta doorashada Madaxweynaha maamulka Puntland.

CCC Sharmaarke oo ay kasoo xirxirmeen albaabadii xil ka qabashada Dowlada Somalia ayaa waxaa doorashada Puntland garab weyn kusiin doona dowlada Imaaraadka Carabta oo iyadu dooneysa inay u adeegsato danaheeda Siyaasadeed ee Somalia.

CCC Sharmaarke, oo seddexdii sano ee ugu danbeysay ku xirnaa dowlada Imaaraadka ayaa laga cabsi qabaa in dhaqaale culus lagu bixiyo si uu kursiga u gala wareego C/weli Gaas oo isagu baqdin ka qaba musharaxnimada CC.

CCC oo markii hore aan usoo jeedin baadi goobka xilka Madaxweyninimo ee maamulka ayaa waxa uu go’aankaani qaatay dabayaaqada Bishii Lixaad 2018 kadib markii magaalada Nairobi ay kuwada kulmeen wafdi ka socday dowlada Imaaraadka kuwaa oo ku tashkiiliyay ku biirida Musharaxiinta, iyadoo ballanqaad dhanka dhaqaalahana u sameeyay.

Danaha ku hoos qarsoon taageerada ay dowlada Imaraadka Carabta u sameyneyso CCC Sharmaarke ayaa waxaa ugu waaweyn:-

1-In looga gaashanto burbur ku imaada Heshiiska Dekadda ee horay u dhexmaray Puntland iyo shirkada DP World.

2-In CCC Sharmaarke lagu gaaro danaha Siyaasadeed uu imaaraadka ka leeyahay Somalia, iyadoo lagu caburinaayo dowlada Somalia oo khilaaf uu kala dhexeeyo Imaaraadka.

3-In guushiisa kadib uu fududeeyo dhismaha Saldhig Militerey uu Imaaraadka ka furanaayo Puntland.

Dowlada Imaaraadka ayaa ka carareysa in maamulka Puntland uu ka arimiyo musharax aan iyagu wadan kaa oo caqabad ku noqon kara danahooda Siyasadeed ee Somalia iyo tan Puntland, waana sababta keliya ee ku khasbeysa inay taageeran CCC Sharmaarke.

Sidoo kale, C/weli Gaas oo dareen ka qaba ololaha CCC Sharmaarke ayaa u muuqda mid ay lasoo deristay walaac dhanka doorashada ah, waxaana xusid mudan in ilaa iyo iminka uusan ku dhawaaqin musharaxnimadiisa.

Si kastaba ha ahaatee, C/weli Gaas, ayaa aaminsan in musharaxa keliya ee ku qalqal galinkara doorashada uu yahay CCC Sharmaarke, waxa uuna si gaara dareen uga qabaa garabka maaliyadeed ee uu ka helaayo Imaaraadka.

Caasimada Online
Xafiiska Garoowe
Caasimada@live.com