Mustafe Cagjar oo soo bandhigay nooca calanka cusub ee uu yeelan doono maamulka DDSI (Sawir)

[Deeq A.]

Jigjiga (Caasimada Online)-Sida aan wararkeena hore ku sheegnay Madaxweynaha cusub ee dawlad deegaanka Soomaalida Ethiopia Mustafe Muxumad Cumar (Mustafe Cagjar) ayaa ku dhawaaqay in dib loo bedelaayo calanka iyo magaca maamulka DDSI.

Mustafe Cagjar, ayaa hadalkan u sheegay dad uu kula hadlayey magaalada Addis ababa waxa uuna ka hor cadeeyay in uu ka shaqayn doono sidii loo beddeli lahaa calanka dawlad-deegaanka.

Mustafe Cagjar, waxa uu sheegay in calanka uu doonaayo inuu yeesho maamulka uu yahay Calanka qaybta dambe ku leh midab buluug ah oo ay dhexda kaga taallo xiddigta cad ee shanta gees leh, waxaana la joojiyey 8 sano ka hor, markii uu maamulka qabtay Cabdi Maxamuud Cumar.

Mustafe Cagjar, waxa uu intaa raaciyay inuu ka shaqaynayo sidii kalmadda Ethiopia looga reebi lahaa magaca dawlad deegaanka oo hadda ah Dawlad Deegaanka Soomaalida Ethiopia, loogana dhigi lahaa dawlad Deegaanka Soomaalida.

Nuqul kamid ah hadalkiisa ayaa ahaa “Cafarta oo degta Jabuuti, Itoobiya iyo Eritrea lama yiraahdo Cafarta Itoobiya, sidoo kalena Orommada oo degta Kenya iyo Itoobiya Lama yiraahdo Orommada Itoobiya, sidaa darteed iima muuqato sabab loo yiraahdo Soomaalida Ethiopia”.

Mustafe Cagjar, waxa uu sidoo kale sheegay in dib loo soo celin doono heesta calanka ee aheyd Soomaaliyey toosa.

Maalmaha fasaxa ee dalka Itoobiya oo ah Sabtida iyo Axadda ayuu sheegay Mustafa in uu ka shaqayn doono inuu soo celiyo sidii jimcaha iyo Axadda looga dhigi lahaa deegaannada Soomaalida.

Docda kale, waxa uu ka digay in laga shaqeeyo amni darro ku imaada deegaanada maamulka, waxa uuna cod dheer ku sheegay in maamulka iyo dhulkuba ay yihiin kuwo hadda degan.

HOOS KA FIIRSO NOOCA CALANKA UU RABO MUSTAFE CAGJAR