Wasiir ka tirsan XFS & Mas’uuliyiin la soctay oo ka badbaaday Qaraxa ka dhacay MUQDISHO

[Deeq A.]

Muqdisho (Caasimada Online)-Qarax xoogan ayaa waxa uu goordhow ka dhacay agagaarka xarunta Wasaaradda Gaashaandhigga Soomaaliya ee magaalada Muqdisho.

Qaraxa oo jugtiisa laga wada maqlay inta badan Degmooyinka magaalada Muqdisho ayaa ka dhashay miino lagu aasay dhinaca laamiga, taa oo wadada loo sii dhigay gaari uu la socday Wasiir ku-xigeen ka tirsan Xukuumada Kheyre.

Qaraxan oo wadada dhinaceeda lagu aasay ayaa dhacay waxyar kadib markii uu halkaasi maray C/laahi Colaad Rooble oo ah Wasiir ku-xigeenka Wasaaradda Gaashaandhigga.

Wasiir ku-xigeenka Wasaaradda Gaashaandhigga ayaa xiliga Qaraxa ka yimid xarunta Wasaaradda oo maanta lagu qabtay Munaasabad ay xilka ku kala wareegayeen Taliyihii hore ee ciidanka xoogga Gen. Gorod iyo Taliyaha cusub Daahir Indha qarshe.

Saraakiishu waxa ay sheegen in Qaraxaasi uu ka badbaaday Wasiir ku-xigeenka iyo istaafkii la socday.

Waxa ay sheegen keliya inuu ku dhintay qof shacab ahaa oo xiliga Qaraxa wadada maraayay, iyagoo intaa raaciyay in Qaraxa uu ahaa mid goobta loo sii dhigay C/laahi Colaad Rooble iyo mas’uuliyiinta la soctay.

Qaraxa kadib waxaa halkaa gaaray Ciidamo ka tirsan dowlda oo halkaa ka qaaday Meyda qofka shacabka ahaa, waxa ayna halkaasi ka sameeyeen baaritaano ku aadan sidii looga daba tagi lahaa raggii falkan ka dambeeyay.

Dhinaca kale, Qaraxa ayaa kusoo beegmaaya xili maalmahaani magaalada Muqdisho ay ka caaganeed Qaraxyo waxyeelo geysta.

Caasimada Online

Xafiiska Muqdisho

Caasimada@live.com