Puntland oo Saldhig ciidan siisay Saraakiil iyo Ciidamo kasoo goostay Somaliland (Warbixin)

[Deeq A.]

Bosaso (Caasimada Online)-Wararka naga soo gaaraya magaalada Garoowe ee maamulka Puntland ayaa sheegaya in maamulka uu Saldhig Militery siiyay Saraakiil iyo ciidamo kasoo goostay Somaliland.

Puntland ayaa la sheegay in Saldhiga ay ugu tallo gashay in lagu xareeyo dhamaan ciidamada kasoo goosta Somaliland iyo Hubkooda.

Saraakiisha iyo ciidamada kasoo goostay Somaliland ee Puntland ka helay Saldhiga ayaa waxaa horboodaya Korneyl Caarre, waxa uuna cadeeyay in Puntland ay siisay Saldhig.

Korneyl Caarre oo shir jaraa’id ku qabtay magaalada Qardho ayaa sheegay in Puntland ay siisay Saldhig uu ku tababaro Ciidan uu sheegay in uu ku xoreynayo Somaliland.

Korneyl Caarre, waxa uu maamulka Somaliland ku eedeeyay qabyaalad iyo in maamulka aan loo sineyn sidaas darteedna uu ka goostay Ciidamadii uu ka midka ahaa, sida uu haddalka u dhigay.

Waxa uu Korneyl Caarre sheegay in uu ilaa hadda yahay qof Somaliland ah,hayeeshee uu diyaar u yahay in uu suuliyo waxa uu ugu yeeray caddaalad darrada ka jirta degaanada Somaliland.

Sidoo kale, waxa uu sheegay Korneyl Caarre in waxyaabaha aadka ugu yaabiyay ay kamid tahay in Ciidanka Somaliland uu ku dhex arkay Carruur Agoon ah oo qaadanaya xuquuq iyo kuwo la mid ah oo aan qaadaneyn.

Puntland ayaa dooneysa in ciidamadan ay u adeegsato Somaliland oo xiligan uu kala dhexeeyo dagaal ka dhashay lahaanshiyaha Gobolka Sool.

Dhinaca kale,Puntland ayaa horay u sheegtay in Somaliland ay dhabarka u dhigan doonto wixii mas’uuliyad ah oo ka dhasha duuleenka ay kusoo qaaday Gobolka Sool.

Caasimada Online

Xafiiska Boosaaso

Caasimada@live.com