Wafdiga Eritrea oo caawa ku hoyanaya Muqdisho iyo Cawad oo xog ka bixiyey

[Deeq A.]

Muqdisho (Caasimada Online) – Wafdigan oo aad u kooban ayaa waxaa maanta Garoonka Aadan Cadde ee magaalada Muqdisho kusoo dhaweeyay Ra’isul wasaaraha Xukuumada Somalia Xasan Cali Kheyre iyo Wasiirka arrimaha dibadda Somalia Axmed Ciise Cawad.

Wafdi ka socda Dowladda Eritrea oo uu hoggaaminaayo Wasiirka arrimaha dibadda dalkaasi Cusmaan Saalax, ayaa waxaa qeyb ka ah la-taliyaha Madaxweynaha dalkaasi Afwerk kuwaa oo magaalada Muqdisho u imaaday arrimo muhiim ah, sida ay xaqiijiyeen masuuliyiin ka tirsan Villa Somalia.

Wasiirka arrimaha dibadda xukuumadda federaalka Somalia Axmed Ciise Cawad oo goordhow la hadlay mid kamid ah Idaacadaha maxaliga ayaa uga waramay arrimaha ay magaalada Muqdisho u soo gaareen wafdiga Eritreaa.

Wasiir Cawad oo faahfaahinaayay safarka ayaa waxa uu sheegay waxyaabaha ay wafdigan u yimaadeen Muqdisho inay ka mid tahay inay ka mahad noqaan booqashadii Madaxweyne Farmaajo ku tagay dalka Eritrea.

Cawad, waxa uu tilmaamay in Madaxda Qaranka ay kala hadleen arrimo ay kamid yihiin xiriirka labada dal, dhaqan galinta Heshiiskii lagu wadagalay magaalada Asmara, Is weydaarsiga xogaha khuseeya furashada labada safaaradood iyo in la adkeeyo xiriirka labada dal.

Waxa uu Wasiir Cawad tilmaamay in dowalada Somalia ay ahmiyad gaara siineyso dalka Eriterea oo uu sheegay inay kaga dhow yihiin dalal badan oo xiriirkooda uu yahay mid cusub.

“Wafdiga caawa waxa ay ku hoyanayaan magaalada Muqdisho inta ay joogan waxa ay sii wadi doonaan kulamada kala dhexeeya madaxda Soomaalida maadaama booqashadoodu tahay laba cisho”

Wuxuu sheegay in maanta wafdiga si weyn loo soo dhaweeyay, sidoo kalena magaalada Muqdisho ay booqasho ku joogi doonaan Laba maalmood.

Cawad ayaa cadeeyay in dowlada Somalia ay si dhaqsi ah ku furan doonto Safaaradeeda Asmara oo uu tilmaamay inay ahmiyad gaara u leedahay Somalia, isla markaana safarkooda uu qeyb ka yahay sida ay ku xoojin lahaayen arrimaha Safaarada.

Sidoo kale, Wasiir Cawad ayaa ka gaabsaday wararka sheegaya in magaalada Muqdisho uu kusoo fool leeyahay Madaxweynaha Eritrea, isla markaana safarka Wafdigaani uu hordhac yahay.

Dhawaan ayay aheyd markii magaalada Asmara ee dalka Eriterea uu gaaray Madaxweynaha Somalia Maxamed C/llahi Farmaajo oo halkaa heshiis kula soo galay dhigiisa Eriterea.

Caasimada Online
Xafiiska Muqdisho
Caasimada@live.com