Jawaab ku socota qoraalki saadaasha xiisadaha ka taagan Soomaali Galbeed

[Deeq A.]

Ina Cabdisamadoow, waxaan aqriyay qoraal aad ku soo bandhigtay Caasimada Online oo aad kaga hadlaysay waxa dhici kara hadii ay ciidanka Itoobiya xoog wax ku raadiyaan iyo hadii ay xal siyaasadeed wax ku raadiyaa.

Waxaan si qoto dheer u aqriyay qoraalka dheer ee aad soo ku daabacday beejkaasi aan sare ku soo sheegnay, balse waxaan aad ula yaabay sida indha la’aanta ah ee aad ugu hadleyso qabiilka loo yaqaano Ogaadeen, gaar ahaan marka aad is barbardhiga ku sameyneysa laba xaaladood waxaa aad uga muuqda in aan buunbuunineysa Ogaadeen.

Anigu waxaan leeyahay:

1. Warkaaga waa kicin Soomaalida iyo Oromada iyo abaabul dagaal;
2. Buunbuunin Ogaadeen iyo Cabdi Ileey;
3. Beer laxawsi Soomaalida inteeda kale oo ‘waawareey Oramadii ayaa soo socota’;
4. Ogaadeen oo khatar dareemaya in tala gacantooda ka baxaysa, gaar ahaan kala dirida iyo hub ka dhigidiisa ciidanka sida wuxuushnimada u laayay Soomaali Galbeed iyo Soomaali inteeda kale. 

Hadaba anigu waxaan ka leeyahay arintaa: 

1. Ma dhici doonto in mar damba tala gacantiisa dib u xukumo ugu soo noqoto arxanlaawihii gumaadaka iyo silica dilka u geysan jiray Soomaalida Itoobiya;

2. Ma dhici doonto in madax Soomaali dambe oo Tigree ka amar qaata uu dib ugu talin Soomaalida Itoobiya;

3. Ma dhici doonto in baa’ba iyo xasuuqa aad ka sheekeynaysa in ay dhici doonaan hadii aanan la sameyn qodobadii aad ku andacootay in la sameeyo hadii nabad laga doonaya Soomaalida Itoobiya;

4. Ma dhici doono dagaal daba dheeraada oo dhex mara Soomaalida iyo Oramada, xasaradda taagana waxa ay noqon doonaan kuwa soo afgarma;

5. Ma dhici doonto in gabhada ONLF ay talada dalka Itoobiya ay qeyb ka noqdaan iyagoo gabhad ah marka laga reebo in kuwa Soomaalida iyo Itoobiyaanka la jaangaadi kara oo aanan ahayn kuwa ay madax martay Ogaadinimada.

Ugu dambeyn waxaad tiri hadii ay ogaadeen heli waayaan intaasi waa in ay Soomaalidu u diyaar garoowdaa  Colaad iyo Dagaal. Anigu waxaan ku leeyahay:

1. Dhamaan Soomaalidu ma wada saameyn doonta colaada iyo xasuusqa iyo halaaga dhici doona ee aad adigu abuureeso ee waxa uu sameyn doonaa kuwa is hor istaaga ku sameeya Xukunka Dowladda Itoobiya gaar ahaan wuxuushta Liyuu Police ee aad ku sheeg 30,000-60,000 kun, jabhada Ogaadeenka iyo Arxan laawada Ina Ileey oo gumaadka iyo silac dilka u geystay Soomaalida Itoobiya.

2. Oramadu iyo Soomaalidu waa ay heshiin doonaan si ku dheehan waalnimo iyo oodwadaag.

3. Dowlada Itoobiya waxay gacan bir ah ku dhigi doontaa qaswadayaasha aan hora ku soo sheegay iyo daba dhilifka abuuraya isku dhacyada qowmiyada oo qoraalada guracan ku soo badhigaya baraha bulasha.

4. Waxaa xukunka la wareegi doona kuwa naxariis u leh una siman yihiin shacbi weynaha ku nool deegaanada Soomaalida ee Itoobiya. Xunkana waxa uu noqon doonaa mid matalaad buuxda leh dhaamaan umadda ku nool deegaanka.

Ugu dambeyn, waxa ay ila tahay in ay Soomalidu meel ay joogtaba fahan buuxda ka qaadato owr kacsiga Ogaadeenka Itoobiya iyo ujeedoonka guracan kuwii ka haray maamulkii Tigreega aadna uga feyjugnaadaan huuhaada ay baraja bulshada ku soo qoraan.

W/Q: Maxamed Abshir Nur
Khabiir Arimaha Gobalka 

Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada caasimada@live.com Mahadsanid