C/weli Gaas iyo Muuse Biixi oo warar iska soo horjeeda kasoo kala saaray Qaraxii BUUHOODLE

[Deeq A.]

Muqdisho (Caasimada Online)-Hoggaamiyaha maamulka Somaliland Muuse Biixi Cabdi ayaa si kulul uga hadlay qaraxii xalay fiidkii ka dhacay magaalada Buuhoodle ee gobolka Togdheer kaa oo lagu dilay Siyaasiyiin caan ahaa.

Qaraxa oo ahaa mid aad u xooganaa ayaa waxaa ku dhintay Wasiirki hore ee arrimaha gudaha maamulka khaatuma Axmed Maxamuud Doolaal iyo Cabdifataax Maxamed Cali oo la taliye u soo noqday Ra’iisul Wasaarihii hore ee Soomaaliya Cumar Cabdirashiid Cali Sharmaake.

Waxa uu Hoggaamiye Muuse Biixi sheegay inay muhiim tahay in la sameeyo baaritaano lana ogaado cidii ka danbeysay Qaraxa maadaama ay ku dhinteen mas’uuliyiin.

Muuse Biixi, waxa uu laamaha amniga faray inay baaritaan buuxa ku sameeyan sida wax u dhaceen, islamarkaana gacanta ku soo dhigaan cidii ka dambeysay falkaas argagagax ku abuuray bulshada Buuhoodle.

Waxa uu Biixi sheegay in laamaha amniga ay kula xisaabtami doonaan Qaraxa, waxa uuna tuhun ka muujiyay Qaraxa iyo cida ka danbeysa.

Somaliland ayaa war saxaafadeedka ay soo saartay waxa ay ku sheegtay in Xukuumadda Somaliland aanay marnaba u dulqaadan doonin cida ka danbeysa Qaraxa, dhibaato iyo falal amni daro ku qaado shacabka Somaliland.

Hoggaamiyaha maamulka Puntland Cabdiwali Gaas oo isna ka hadlay Qaraxa ayaa amar ku bixiyay in saacado kooban lagu soo qabto shaqsiyaadka ka danbeeyay Qaraxa.

C/wali Gaas waxa uu sheegay in Puntland aysan indhaha ka qabsan doonin Qaraxyada loo maleegayo mas’uuliyiinta soo qabtay xilalka.

Gaas, waxa uu sheegay in Puntland ay banaanka soo dhigi doonto cida ka mas’uulka ah Qaraxa lagu dilay mas’uuliyiinta, waxaana haddalka C/weli Gaas ka muuqday tuhun aan cadeyn halka uu ku wajahan yahay.

Sidoo kale, Puntland waxa ay qoraal ku sheegtay in dadkii ku geeriyooday qaraxaas ay ka mid ahaayeen Siyaasiyiin ka soo jeeda deegaanada Maamulka Puntland, balse aan laga aamusi doonin.

Si kastaba ha ahaatee, labada maamul ayaa mid waliba sheeganaaya in Siyaasiyiinta lagu dilay Qaraxa ay ahaayen kuwo taabacsan maamulkooda.

Caasimada Online

Xafiiska Muqdisho

Caasimada@live.com