Xildhibaan ka tirsan BF oo shaaciyay halka dilalka iyo qaraxyada lagu diyaariyo

[Deeq A.]

Muqdisho (Caasimada Online) – Xildhibaan Daahir Amiin Jeesow oo xubin ka ah guddiga arrimaha gudaha iyo amniga ee golaha shacabka oo u waramaayay Idaacada risaala ee magaalada Muqdisho ayaa si qoto dheer uga hadlay halka laga soo agaasimo Qaraxyada iyo dilalka qorsheysan ee kadhaca magaalada Muqdisho.

Xildhibaan Daahir Amiin, ayaa sheegay in Qaraxyada iyo dilalka qorsheysan aysan ka imaan banaanka sare ee magaalada waxa uuna cadeeyay in Qaraxyada lagu dhex sameeyo gudaha Muqdisho, halka maleeshiyaadka xirxira iyo kuwa fuliya ay ku dhex noolyihiin isla magaalada.

Xildhibaan Jeesow ayaa sheegay in Wasaaradda amniga looga baahan yahay iney shaqadeeda qabsato oo aysan u taagneyn magac ahaan.

“Maaha in la isticmaalo keliya magaca wasaarada amniga waa in lagu shaqeeyaa wasaarada waxaa laga doonayaa inay nabadeyso magaalada Muqdisho”

Sidoo kale, Xildhibaan Daahir Jeesow waxa uu tilmaamay in dhammaan xubnaha Guddiga arrimaha gudaha iyo amniga ee golaha shacabka ay aminsan yihiin in dadka ka dambeeya dilalka qorsheysan ee Caasimada ka dhaca iyo qaraxyada iney ku sugan yihiin gudaha Muqdisho.

Geesta kale, Guddiga ayaa sidoo kale sheegay in ay muhiim tahay in shacabka Muqdisho ay iska soo dhex saaraan dadka ku dhexjira ee falalka amni dario ka wada Caasimada.

Caasimada Online
Xafiiska Muqdisho
Caasimada@live.com