Weerar madaafiic ah oo lala beegsaday diyaarad ku soo dagtay duleedka Baraawe

[Deeq A.]

Baraawe (Caasimadda Online) – Tiro Madaafiic ah ayaa lagu beegsaday diyaarad Milatari oo nooca Helicopter-ka ah xilli ay ku soo dageysay saldhig Milatari oo ku yaalla duleedka degmada Baraawe.

Diyaaradda oo sahay u sidday Ciidamada AMISOM ee ku sugana gudaha Baraawe ayaa lagu beegsaday madaafiicda xilli ay ku soo dageysay gudaha saldhig ku yaalla deegaanka Ambareeso ee duleedka Baraawe.

Warar xog ogaal ah ayaa sheegaya in madaafiicda qaar ay ku dhaceen meel aan ka fogeyn diyaaradda taas oo keentay in qalqal weyn uu ka dhaco gudaha saldhigga, ugu danbeynna diyaaraddii ay carartay iyadoon wax sahay ah dajin sida ay qoreen warbaahinta Ururka Al-Shabaab.

Warbaahinta ay leeyihiin Ururka Al-Shabaab ayaa lagu soo qoray in  Ciidamo fara badan oo ku xoomay diyaaradda si ay sahayada uga dajiyaan ay  soo gaareen khasaarooyin kala duwan.

Sidoo kale warbaahintaas ayaa qoray inay duqeyntaas ka dhalatay dhimashada 3 askari oo 2 ay yihiin kuwa Soomaalida iyo 1 ka tirsan Ciidamada Uganda sida ay hadalka u dhigeen.

Guddoomiyaha gobolka Shabeelaha Hoose Maxamed Ibraahim Barre ayaa isna dhankiisa sheegay inay dhinteen  2 ruux oo midi shacab yahay midna Ciidan yahay

Ma jiraan faafaahin intaas dhaafsiisan oo laga helayo weerarkaas madaafiicda ah ee Al-shabaab maanta ay ku tuureen Diyaarad saanad Ciidan u watay Ciidamo ka tirsam Xooga Soomaaliya iyo kuwa AMISOM ee gobolka Shabeelaha Hoose.

Wixii warar ah ee kusoo kordha waan idinla socodsiin doonaa Inshaa Allah.