Maxaan ka barran karnaa haddalada Anwar Gargash ee iska soo hor-jeeda?!!!

[Deeq A.]

Abu Dhabi (Caasimada Online) – Sida aan wararkeena hore ku sheegnay Dowladda Imaaraadka Carabta ayaa dalbatay in dowladda Somalia ay raali gelin buuxda ka bixiso dhacdadii bishii April ee sanadkan Garoonka Diyaaradaha magaalada Muqdisho, taasi oo la xiriirtay Diyaarad Imaaraadku lahaa oo lagu xanibay garoonka.

Dalbka raali galinta ayaa waxaa soo jeediyay Wasiiru Dowlaha Arrimaha Dibadda ee Imaaraadka Carabta Dr. Anwar Gargash oo sheegay in dowladda Somalia ay hada qiratay khaladka ay ka gashay Imaaraadka.

Dr. Anwar Gargash oo u muuqday mid uu is khilaafayo haddalkiisa ayaa marka hore sheegay in Somalia ay ka dalbanayaan inay bixiso raali galin, halka qodobka labaad uu ka sheegay in Somalia ay qiratay inay khalad ka gashay Imaaraadka.

Anwar Gargash, waxa uu horay u sheegay in dowlada Imaaraadka ay lacagtaasi u waday meel kale balse ay u gacangashay dowlada Somalia, isagoo xiligaa hadalkiisa ku muujinaayay mid ay ku khaldanaayen maadaama aysan wargalin dowlada Somalia, mana cada sababta uu isku khilaafayo haddalka Imaaraadka.

Erayada adag ee uu adeegsanayo Anwar Gargash waxa uu daba socdaa wadahadalka ay dowlada Eriterea ay ka dhex abuureyso Somalia iyo Imaaraadka, waxa uuna dhoolatus u yahay in Somalia ay ku khasbanaan doonto aqbalaada wax waliba oo kaga imaanaya dowlada Imaaraadka sida in raali galin ay bixiso iyadoo dulman.

Wuxuu sheegay Wasiiru Dowlaha Arrimaha Dibadda ee Imaaraadka Carabta in dowladda Somalia ay ku xad gudubtay dowladdiisa.

Anwar Gargash, waxa uu sheegay in Somalia ay ku khasban tahay inay cafis ka dalbato Somalia si xal iyo waan-waan looga dhexsameeyo labada dal oo uu sheegay inuu weli ka dhexjiro khilaaf.

Wuxuu sheegay Gargash isaga oo ka hadlayay xarunta cilmi baarista ee Policy Exchange ee magaalada London ayaa wuxuu sheegay in ay socdaan dadaalo lagu xalinayo khilaafka labada dowladood.

Madaxda Dowlada Imaaraadka carabta waxa ay inta badan si maldahan isugu dhexyaaciyan hadalada iyo eedaha ay u jeediyaan Somalia, taas oo ugu wacan inay ku fashilmaan dhamaan danihii ay ka lahaayen Somalia.

Sidoo kale, Dhaxal sugaha dalka Imaaraadka Carabta Sheekh Maxamed Bin Zaa’id Aala Nahyaan, ayaa dhankiisa ka sheegay in Somalia ay ku abaal-dhacday Imaaradaka carabta isagoo tilmaamay inaysan ka helin abaal gudkii ay ka filayeen.

Si kastaba ha ahaatee, dowlada Imaaraadka carabta ayaa xooga saareysa wadada ay Somalia ku bixin laheyd raali galin iyadoo qarineysa khaladaadka ay ka gashay Somalia oo ahaa mid lagu duminaayo qaranimada Somalia.

Caasimada Online
Xafiiska Muqdisho
Caasimada@live.com