Ciidamada NISA oo weerar ku qaaday guriga wasiir ka tirsanaa xukuumaddii CC

[Deeq A.]

Muqdisho (Caasimada Online) – Ciidamada nabad-sugidda Soomaaliya ayaa xalay weerar saqdhexe ah ku qaaday guriga wasiir ku xigeenkii hore ee wasaaradda howlaha guud iyo dib u dhiska Soomaaliya Maxamed Cumar Geedi, oo ka tirsanaa xukuumaddii Cumar Cabdirashiid.

Shir jaraa’id oo uu maanta ku qabtay magaalada Muqdisho, ayuu wasiirka ku sheegay in ciidamada ay kasoo boodeen darbiga gurigiisa oo ku yaalla agagaarka xarunta NISA ee godka Jilicow, ayna cabsi xooggan geliyeen isaga iyo qoyskiisa.

Maxamed Cumar Geedi ayaa sheegay in lagu soo bartilmaameedsaday sababo la xiriira inuu kasoo horjeedo, islamarkaana dhalleeceeyo siyaasadda xukuumadda ra’iisul wasaare Xasan Cali Kheyre.

Waxa uu sidoo kale shaaca ka qaaday in ciidamadan uu watay nin lagu magacaabo Jaabir oo madax ka ah godka Jilicow.

Waxa uu wax laga xumaado ku tilmaamay in hay’adda NISA oo shaqadeedu tahay sugidda amniga Soomaaliya loo adeegsado fulinta hadafyo siyaaseed.

NISA ayaa hadda ka hor dhowr jeer sidan oo kale weeraro ugu qaaday siyaasiyiin mucaarad ku nah xukuumadda Kheyre.

Hoos ka daawo Maxamed Cumar

Caasimada Online
Xafiiska Muqdisho
Caasimada@live.com