Minnesota: Ilhaan Cumar oo laga gudbiyey dacwad la xiriirta eedeymo culus

[Deeq A.]

Minneapolis (Caasimada Online) – Sharci dejiye ka tirsan golaha wakiilada Minnesota,  Steve Drazkowski ayaa Ilhaan Cumar oo u tartameysa aqalka congress-ka Mareykanka ka gudbiyey dacwad ah inay si qaldan u adeegsatay lacag loogu deeqay ololaheeda doorasho.

Drazkowski, oo ka tirsan xisbiga Jamhuuriga ayaa su’aal ka keenay lacag dhan 2,250 oo dollar oo Ilhaan ay bishii November ee 2016 siisay xafiiska garyaqaanada Kjellberg Law Office. Xafiiska oo ku taqasusay sharciga qoyska ayaa ka shaqeeyey kiiskii furriinka Ilhaan ee 2017-kii.

Drazkowski ayaa sheegay in lacagtaas ay ahayd lacag Ilhaan loogu deeqay doorashadeeda, balse ay u adeegsatay arrimo qoys oo ayada u gaar ah.

Qareenka Ilhaan oo leh xafiiskan ayaa ku gacan seertay eedeymaha loo jeediyey kalyantigeeda.

“Tani gebi ahaanba waa been. Waxaan Ilhaan siiyey talo la xiriirta maareynta xasaradaha. Lacagta ay isiisayna waxay ahayd mid taas loogu talo-galay ee ma ahayn mid furriin la xiriirta” ayey tiri qareenka Ilhaan, Carla Kjellberg.

Sidoo kale qoraal ay soo saartay ayay Ilhaan ku sheegtay in eedeymahan ay yihiin kuwa been abuur ah.

Drazkowski ayaa sheegay in Ilhaan ay leedahay taairikh xadgudubyo lacagta ololaha doorashada ah, oo tani aysan ugu horreyn.

Bishii tagtay waxaa lagu ganaaxay Ilhaan 1,100 oo dollar markii ay diiwaan gelin weysay danaheeda dhaqaale. Sidoo kale bishii May 2017 waxaa lagu ganaaxay 1,000 dollar kadib markii xilli dambe un ay shaacisay lacag la siiyey ololaheeda doorasho. Bishii November ay 2017 ayaa 150 dollar oo ganaax ah waxay ku muteysatay diiwaan-gelin lacageed oo xilligeeda ka daahday.

Caasimada Online
Xafiiska Minneapolis
Caasimada@live.com