Sawirro: DFS iyo QADAR oo wadahadlay iyo Qadar oo ka dhabeyneysa hal arrin

[Deeq A.]

Muqdisho (Caasimada Online) – Waxaa magaalada Muqdisho ee caasimada Somalia kulan ku yeeshay Wasiirka Arrimaha Dibadda iyo Iskaashiga Caalamiga ah Axmed Ciise Cawad iyo Danjiraha Qadar ee Somalia Xasan bin Xamsa Asad Haashim.

Kulanka oo ahaa mid saacado badan qaatay ayaa waxa uu ka dhacay Xafiiska Wasiirka waxaana diirada lagu saaray xiriirka labada dal, Bilaabida howlaha Qadar ee Somalia iyo in Qadar ay ka dhabeyso ballanqaadyada ay u sameysay Somalia, waxaa kale oo la is dhaafsaday aragtiyo ku salaysan arrimaha gobolka iyo dunida.

Danjire Xasan bin Xamsa Asad Haashim waxa uu kulanka ka sheegay in Qadar ay ka dhabeyneyso hirgalinta dhamaan ballanqaadyada ay u sameysay Somalia, waxa uuna sidoo kale Wasiir Cawad ku wareejiyay warqad uu uga waday dhigiisa Qadar.

Intaa kadib Danjire Xasan Xamsa ayaa gaari qafilan oo aanu xabadda karin ku wareejiyay Wasaaradda Arrimaha Dibadda Somalia si Wasaarada ay ugu adeegsato arrimaha muhiimka ah.

Danjire Xasan Xamsa waxa uu sheegay in gaariga uu yahay hadiyad ka timid Xukuumadda iyo Shacabka Qatar.

Gaariga ayaa waxaa lagu biirin doonaa gaadiidka martida looga soo qaado Garoonka Aadan Cadde ee magaalada Muqdisho,sida uu kulanka ka sheegay Danjiraha.

Dowlada Qadar ayaan inta badan aan fulin ballanqaadyada dhaqaale oo ay u sameyso Somalia, xili dowlada Somalia lagu eedeeyo in si toosa ay ula safatay Qadar.