Sarkaal ka tirsan ciidanka xoogga oo la xiray markuu iska dhigay taliye Gordon

[Deeq A.]

Muqdisho (Caasimada Online) – Wararka laga helayo magaalada Muqdisho ayaa waxa ay sheegayaan in Sarkaal ka tirsan ciidamada Xooga Somalia xabsiga loo taxaabay.

Sarkaalka ka tirsanaa ciidamada ee xiray ayaa waxaa la sheegay inuu iska dhigay taliyaha ciidamada Xooga dalka Cabdiweli Jaamac Gorod.

Sarkaalka falkaan ku dhaqaaqay oo ah Korneel ayaa lagu magacaabaa Yaasiin, isagoo ka howlgali jiray gobolka Gedo oo uu taliye ugu ahaa 53 askari balse markii dambe usoo wareegay magaalada Muqdisho sida uu sheegay sarkaal ka tirsan milatariga Somalia.

Waxaada dambi barista ee CID-da ayaa la sheegay in iminka ay baaris ku heyso xiriiro sarkaalkan uu la sameeyay saraakiil ajaaniib ah isagoo iska dhigayay Gen. Gorod.

Sida laga soo xigtay ilo milatari Korneel Yaasiin ayaa ku noolaa dalka Mareykanka kahor inta aanan loo qoran ciidamada milatariga Somalia.

Falkaan ayaa ah kii ugu horeyay ee noociisa ee uu sarkaal ka tirsan ciidamada Xooga iskaga dhigo inuu yahay taliyaha ciidamada Xooga dalka.

Caasimada Online
Xafiiska Muqdisho
Caasimada@live.com