Xog: KHEYRE oo warqad u diray Sacuudiga – DF oo shirkado ajnabi ka door bideysa kuwa Soomaalida

[Deeq A.]

Muqdisho (Caasimada Online) – Warar cusub oo soo baxay ayaa sheegaya in heshiiska ay dowladda Soomaaliya ay ku dhawaaqday in laga gaaray muranka xajka uu yahay mid aan jirin, islamarkaana xaaladda ay weli cakiran tahay, sida ay ogaatay Caasimada Online.

Ilo-wareedo lagu kalsoon yahay ayaa Caasimada Online u sheegay in weli dowladda Sacuudiga ay ku adkeysaneyso in kaliya shirkadaha Jubba iyo Daallo ay dadka Soomaalida usoo qaadaan xajka.

Waxaa jira shuruudo badan oo laga doonayo shirkadaha diyaaradaha ee xajka u qaada dadka, kuwaas oo aysan weli buuxin shirkadaha kala ah Ocean, Freedom iyo African. Wasaaradda xajka Sacuudiga ayaa ku adkeysaneysa inaysan hayn waqti ay baaritaan ugu sameyso shirkadahan, sidaas darteedna waxay dalbatay in sanadka xiga un ay usoo diyaar garoobaan.

Ra’iisul wasaaraha Soomaaliya Xasan Cali Kheyre ayaa habeen hore warqad u diray wasaaradda xajka Sacuudiga, isaga oo sheegay inuu si shaqisyan ah damaanad uga noqonayo shirkadahan. Warqaddaas ayaan weli laga soo jawaabin.

Dadka aqoonta u leh arrimahan ayaa la-yaab ku tilmaamay warqadda, ayaga oo sheegay in ra’iisul wasaaraha uusan fahamsaneyn nidaamka duulimaadyada, islamarkaana damaanad shaqsiyad aan lagu ogolaan karin duulimaadyada shirkado aan la baarin.

Waxa ay sidoo kale la-yaab ku tilmaameen sababta Kheyre ugu kala eexanayo shirkado Soomaaliyeed oo uu ka dhaxeeyo loolan ganacsi.

Dowladda ayaa soo jeedisay shirkadaha ay diideen Sacuudiga ay dadka geeyaan Nairobi iyo Jabuuti, kadibna ay halkaas ka qaadaan shirkadaha diyaaradaha Jabuuti iyo Kenyan.

Tani ayaa macnaheedu yahay in dowladda door bideyso in macaashka duulimaadka xajka ay qaataan shirkado diyaaradeed oo shisheeye, halkii ay ka qaadan lahaayeen Jubba iyo Daallo, maadaama shirkadihii dowladdu wadatay la diiday.

Ayada oo la heli karo shirkado Soomaaliyeed oo dadka si toos ah u gayn kara Sacuudiga, maxaa qasabaya in shirkado ajnabi ah la siiyo qandaraaska?

Caasimada Online
Xafiiska Muqdisho
caasimada@live.com