2 shakhsi oo loo badinayo in midkood noqon doono wasiirka waxbarashada DF

[Deeq A.]

Muqdisho (Caasmadda Online) – Dowladda Soomaaliya ayaa xilkii ka qaaday Wasiirkii hore ee Waxbarashada Cabdiraxmaan Daahir Cusmaan kadib Digreeto kasoo baxday Ra’isulwasaare Kheyre.

Wasiirkii hore ee Waxbarashada ayaa la rumeysan yahay inuu xilkiisa ku waayey hadalkii uu sheegay ee ahaa inaysan dowladda Soomaaliya aqoonsaneyn Jaamacadaha dalka ku yaalo ee soo shaqaanayey 30-kii sano ee dalka qalalaasaha ku jiray.

Midda sida weyn ay madaxda u dhibsadeyn ayaa aheyd hadalkii Wasiirka ee ahaa inaysan dowladda xataa aqoonsaneyn jaamacadda Umadda oo la ogyahay inuu Madaxweyne Sharafeed ka yahay Madaxweyne Maxamed Cabdullaahi Farmaajo weliba ay jaamacadda wado howl weyn oo cilmi baaris gudaha ah oo ay ka qeyb galayaan Qubaro ajaanib ah. Cilmi baaristaas ayaa la filayaa in dhawaan lasoo bandhigo.

Haddaba isla markii xilka laga qaaday Wasiir Cabdiraxmaan waxaa bilowday olole xooggan oo lagu doonayo xilkaas.

Waxaan warbixintaan idinkugu soo gudbineynaa laba shakhsi oo si weyn loogu saadaalinayo inuu midkood noqon doono Wasiirka Waxbarashada.

Ra’isulwasaaraha Xasan Cali Kheyre ayaa raba in uu xilkaas u magacaabo xildhibaan Cabdullaahi Goodax Barre halka Goodax uu aad u daneenayo in loo dhiibo  wasaaradda Amniga Gudaha oo ah xil aan banaaneyn.

Dhanka kale Madaxweyne Farmaajo ayaa isna daneenayo in xilkaas loo magacaabo xildhibaan Nuur Idow Beyle oo ay Villa Soomaaliya ka caawisay sidii uu u noqon lahaa xildhibaan.

loolanka u dhaxeeyo labadaan shakhsi ayaa aad u adag maadaama ay labaduba yihiin kuwa xiriir fiican oo weliba dhow la leh dowladda Soomaaliya.

Waxaa labadooba rajo fiican leh Xildhibaan Nuur Iidow Beyle maadaama Goodax Barre uu ku qanacsan yahay in isku shaadheyn la sameeyo isla markaasna uu noqdo Wasiirka Amniga Gudaha.

Waxaa macquul ah inay dowladda Soomaaliya waqti badan geliso magacaabista xilkaan banaan isla markaas ay si weyn uga fiirsan doonto maadaama ay ku badatay xil ka qaadis iyo magacaabis.

Caasimada Online
Xafiiska Muqdisho
Caasimada@live.com