Gaadiid dagaal oo ku qulqulaaya Af-urur & Al-Shabaab oo Hubka culus ku xirtay deeganka

[Deeq A.]

Garoowe (Caasimada Online)-Wararka naga soo gaaraya deegaanka Af-urur ayaa sheegaya in halkaa maanta laga dareemayo xiisad dagaal oo u dhexeysa ciidamada maamulka iyo Al-Shabaab.

Wararku waxa ay tibaaxayaan in deegaano ku dhow dhow Af-urur ay goor dhow ka dhaqaajiyeen gaadiid dagaal oo ay la socdaan ciidamo aad u farabadan oo ka tirsan Militeriga maamulka Puntland.

Ciidamada u dhaqaaqay deegaanka Af-urur ee ku jirta gacanta Al-Shabaab ayaa wata gaadiid dagaal oo kor u dhaafaya labaatan kuwaa oo la doonaayo in lagu qabto deegaanka.

Af-urur waxaa xiligan ka taagan xaalad kacsanaan kadib markii ciidamo ka tirsan maamulka ay fariisimo ka dhigteen deegaano dhinaca ku haya Af-urur oo dadkii degnaa ay ka barakaceen.

Sidoo kale, maleeshiyada Al-shabaab oo ka war helay is uruursiga ciidamada maamulka ayaa lasoo sheegayaa in iyana dhankooda ay dhaq-dhaqaaq kawadan gudaha deegaanka Af-urur.

Maleeshiyada ayaa sidoo kale Hubka culus ku xirtay dhamaan daafaha deegaanka kuwaa oo la doonaayo in loo adeegsado duqeymaha.

Dhinaca kale, maleeshiyada Al-Shabaab oo ay soo foodsaartay cabsi dagaal ayaa wada gaaf meer ay uga gaashamanayaan ciidamada Puntland ee duulaanka ku ah.

Caasimada Online

Xafiiska Garoowe

Caasimada@live.com