Madaxweyne Farmaajo oo qorshe cusub ka damacsan isgoysyada MUQDISHO

[Deeq A.]

Muqdisho (Caasimada Online) – War gaar ah oo ay heshay Caasimada Online, ayaa sheegaya in Madaxweynaha Somalia Maxamed C/llahi Farmaajo uu amar ku bixiyay in dhamaan Isgoosyada Muqdisho lagu wareejiyo ciidamada Militeriga.

Wararku waxa ay sheegayaan in Madaxweyne Farmaajo uu amarkaasi duldhigay Taliyaha ciidamada Militeriga iyadoo sugida amniga magaalada Muqdisho ay banaan joog ka noqon doonaan ciidamada Xasilinta.

Ciidamada ugu badan ee ka tirsan Militeriga ayaa lagu wadaa in saacadaha soo socda ee caawa lagu wareejin doono Isgoosyada iyaga oo looga danbeyn doono wixii khuseeya amniga Muqdisho.

Taliyayaasha Ciidamada xasilinta ee laga raray wadooyinka ayaa si hoose uga amarqaadan jiray Ra’isul wasaaraha Xukuumada Somalia Xasan Cali Kheyre.

Saraakiisha Ciidamada Xasilinta ayaa loo heystaa kiisaska dhowr weerar oo ka dhacay magaalada Muqdisho, waxa uuna qorshuhu yahay in xalka amni ee magaalada Muqdisho lagu tijaabiyo ciidamada Militeriga, gaar ahaan qeybta cusub ee la yiraahdo October.

Sidoo kale, ciidamada laga raray wadooynka iyo kuwa la filaayo in lagu daadiyo isgoosyada Muqdisho ayaa khilaaf hoosaad ka dhex abuuray Madaxda ugu sareysa dalka maadaama Hay’adaha khuseeya amniga gudaha ciidamadooda laga qaaday wadooyinka.

Si kastaba ha ahaatee, magaalada Muqdisho ayaa marti galineysa xaalado amni darro oo isugu jirta dilal ay geystaan ciidamada iyo Qaraxyo tuhunbadan dhaliyay.

Caasimada Online
Xafiiska Muqdisho
Caasimada@live.com