Garowe:-Shacab diidmo ka muujiyay barnaamij ay wado Hay,ad laga leeyahay Italy.

[Deeq A.]

Qeybo ka mid ah shacabka magaalada Garoowe ayaa diidmo adag ka muujiyay barnaamij loogu magacdarey diiwaangalinta shacabka oo qorshuhu ahaa subaxnimaddii horre ee maanta in laga bilaabo qaar ka mid ah xaafadaha magaalada Garoowe ka dib markii looga shakiyay inuu baalmarsan yahay sharciga,nidaamka dowliga iyo kan dowlada hoose.

Qeybo ka tirsan bulshada magaalada Garoowe oo isugu jira Aqoonyahano,Odoyaal iyo Dhalinyaro oo warbaahinta la hadlay ayaa sheegay inuu jirey qorshe hadafkiisu yahay sidii dad badan looga qaadi lahaa sawir faro iyo sawir indho oo ay wado Hay,add laga leeyahay dalka Talyaaniga oo magaceeda la yiraahdo ITALIAN AGENCY FOR DEVELOPMENT COOPERATION taasoo ay sheegeen dadkii la hadlay warbaahinta inaysan habayaraatee wax xafiis ah ku lahayn deegaanada Puntland

Dadka xaafadaha 1Augsto iyo Halgan ee magaalada Garoowe ayaa wararku sheegayaan saaka inay joojiyeen iskudaygii u horeeyay oo ahaa hay,addu inay ku bilowdo barnaamijka loogu magacdarey diiwaangalin shacab ka dib markay ku micneeyeen hoosgalis ujeedadiisu aysan cadeyn.

Dhinaca kale Warbaahinta PUNTLAND POST xiriiro kala duwan la samaysay xubno ka tirsan masuuliyiinta maamulka Degmada waxay  u sheegeen inaysan waxba kala socon marka laga reebo cabasho uga timid qaar ka mid ah dadweynaha islamarkaana ay u kuurgali doonaan.

Soo ifbixida barnaamijkan ayaa wararku sheegayaan inay dhalisay kulamo degdeg ah oo looga arrinsanayo kuwaas oo ay wada qaateen masuuliyiin ka tirsan Wasaaradda Arrimaha Gudaha,Maamulka Gobolka Nugaal,Maamulka Degmada iyo Saraakiil ka socota hay,adda Italian Agency, mana jirto xog faahfaahsan oo ilaa iyo hadda laga hayo natiijada shirkaas, wallow warar madax banaan tibaaxayaan masuuliyiin ka tirsan wasaaradda arrimaha gudaha inay si hoose hay,adda uga gacan siinayeen arrinta ay diidmada ka muujiyaan shacab badan oo ku nool magaalada Garowe

PUNTLAND POST

The post Garowe:-Shacab diidmo ka muujiyay barnaamij ay wado Hay,ad laga leeyahay Italy. appeared first on Puntland Post.