Saameynta qoraalkii twitter ee uu FAARAX MACALLIN ku weearay ABIY AHMED

[Deeq A.]

Adis Ababa (Caasimadda Online) – Raisul Wasaaraha Itoobya Dr Abiy Ahmed  waxa uu dar dar iyo himilo bilo kahor dhalanteed u muuqday ku soo kordhiyey siyaasadda mandaqadda Geeska Africa kaddib markii uu sida lama filaanka ah ku qabsaday xilka ugu sarreeya ee dalka ay diktaatooriyaddu la dagtay.

Abiy oo ka soo jeeda qoomiyadda ugu ballaaran Itoobiya ayaa talada dalka ka bedelay Hailemariam Desalegn oo is casilay.

Muddo bilo gudohood ah RW Abiy Ahmed waxa uu ku tallaabsaday siyaasad ka yaabsisay dunida oo dhan kaddib markii uu muujiyy fur furnaansho aan laga fileyn hoggaamiye Itoobiyaan ah.

Waxa uu booqasho ku kala tagay dalalka Geeska Africa sida Djibouti, Sudan, Kenya iyo Somalia.

Laakiin ma jirin mid ka sameyn badneyd ama ka soo jiidasho badneyd booqashii taariikhiga ahayd ee uu ku tagay Asmaro laba toddobaad kahor.

Waxa uu baal cusub u furay xiriirkii diblomaasiyadeed ee Itoobiya iyo Iritriya kuwaas oo dagaal aad u xun dhexmaray sanadihii 1998/2000.

Waxaa booqashadiisa ka sii horreeysay in ay Itooiya ogolaatay heshiiskii Algeris ee dhigayey in Iritriya leedahay dhulka labada dal isku haysteen oo uu dagaalka salka ku hayey in uu sidaas u dhaqan galo taas oo ka carreeysiisay qoomiyadda Tigreega.

Waxaa isna booqasho taariikhiga ah ku yimi Addis Ababa madaxweynaha Eritrea Asisas Afawerki iyaga oo isniintii si wada jir ah u furay safaaraddii Eritrea ee Itoobiya.

Waxaa intaas bar bar socday in uu xabsiyada ka sii daayey dadkii ku xirnaa sida ururada bulshada, saxaafiyiinta iyo siyaasiyiintii mucaaradka ahaa.

Hase ahaatee, waxaa intaa hareer socday amaankii Itoobiya oo u muuqda mid qeybo ka mid ah faraha ka sii baxaya waxaana ugu weyneyd dhacdadii isaga qaraxa lagula beegsaday mar uu fagaare ku yaal bartamaha Addis Ababa dad isu soo baxay kula hadlayey.

Dhinaca kale, waxaa xoogeystay dagaalkii ay Oromada ku haysay Soomaalida oo dad badani ku dhinteen.

Dagaalkaas oo aad u xoogeystay inta uu talada hayey, waxa uu dhaliyey walaac ah in ay Oromadu ku hawlan tahay in ay qoomiyad tir tir waddo (Ethnic Cleansing).

Hadaba, waxaa dareenkiisa barta Twitter-ka ku muujiyey Faarax Macalin Dawaar oo hore u soo noqday gudoomiye ku xigeenka baarlamaanka Kenya kaas oo uga digay RW Itooiya in haddii Oromadu sii waddo gumaadka ay ku hayso Soomaalida  in ay Tigreega iyo xisiga EPRDF ku heli doonaan fursad ay xukunka uga tuuraan iyaga oo ku tilmaami doonaa difiic amaankii hanan waayey.

Dr Abiy, Lema Magersa, Workeneh dhammaantiin joojiya waalida Soomalida hadda haddii kale waxaa si deg deg ah ku soo laaban kara Woyane. Waxa ay u egtahay in Oromadu dharag khamri u dhinteen iyada oo uu 100 maalmood uun uu xukunka hayo Abiy EPRDF waxa ay mar marsiiyo u helin doonaa in ay xukunka ka tuuraan Dr Abiy oo ay ku eedeyn doonaan diciifnimo iyo karti la’aan.

 

Caasimada Online
Xafiiska Muqdisho
Caasimada@live.com