Madaxweyne Farmaajo oo Jabuuti uga Qayb-galaya shir muhiimad gaar ah u leh Afrika

[Deeq A.]

Jabuuti (PP) ─ Madaxweynaha Jamhuuriyadda Federaalka Soomaaliya Mudane Maxamed C/llaahi Farmaajo ayaa u jooga dalka Jabuuti ka Qayb-galka Shirka Madasha iskaashiga Afrika iyo Shiinaha.

Farmaajo iyo wafdigiisa waxaa Garoonka Diyaaradaha kusoo dhaweeyay Ra’iisul Wasaaraha Jamhuuriyadda aan walaalaha nahay ee Jabuuti Mudane Cabdiqaadir Kaamil Maxamed iyo Diblomaasiyiin ka tirsan Safaaradda Soomaaliya ee dalkaas.

Shirkan oo soconaya inta u dhaxaysa 5-7 bishan Luuliyo ayaa looga wada xaajoonaya hirgelinta ganacsiga xorta ah ee Qaaradda Afrika, xoojinta maalgashiga, kobcinta kaabayaasha dhaqaalaha iyo xaqiijinta hiigsiga horumarineed ee 2030-ka ee ajendaha caalamiga ah.

Dhanka kale, Madaxweyne Farmaajo ayaa ka qayb galay saaka furitaanka Aaga Caalamiga ah ee Ganacsiga Xorta ah ee Jabuuti iyada oo ay munaasabaddaasi goobjoog ka ahaayeen Madaxweynaha martida loo yahay Mudane Ismaaciil Cumar Geelle, Madaxweynaha Rwanda, Madaxweynaha Suudaan, Ra’iisul Wasaaraha Itoobiya iyo Guddoomiyaha Midowga.

Madaxweynaha oo khudbad kooban jeediyay ayaa sheegay in furitaanka Aagan ka Caagan Canshuuraha ee Jabuuti ay ka turjumeyso in dalkan uu u diyaar garoobay tartanka ka socda caalamka ee lagu xoojinayo kobcinta iyo isdhex galka dhaqaalaha adduunka iyo kan gobolka.

“Hawshan waxaa galay waqti badan, shaqo badan, aragti fog iyo hoggaan wanaagsan oo uu hormuud u yahay walaalkeen Ismaaciil Cumar Geelle taasoo iyadana ku timid wadashaqeynta shacabka iyo Dowladda Jabuuti,” ayuu yiri Madaxweynaha.

Ugu dambeyn, Safarka Madaxweynaha waxaa ku wehliya Wasiirka Arrimaha Dibadda, Axmed Ciise Cawad, Wasiirka Maaliyadda C/raxmaan Ducaale Bayle, Wasiirka Ganacsiga iyo Warshahada Maxamed Cabdi Xayir Maareeye, Wasiir-u-dowlaha Difaaca, Maxamed Cali Xagaa iyo La-taliyaha Arrimaha Dibadda ee Madaxweynaha, Balal Cusmaan.

PUNTLAND POST

The post Madaxweyne Farmaajo oo Jabuuti uga Qayb-galaya shir muhiimad gaar ah u leh Afrika appeared first on Puntland Post.