Qarax xoogan oo caawa ka dhacay magaalada Muqdisho & Khasaaro ka dhashay

[Deeq A.]

Muqdisho (Caasimada Online)-Jug culus ayaa goordhow laga maqlay magaalada Muqdisho ee caasimada Somalia, waxaana jugta daba socday rasaas goosgoos ah.

Jugta oo inta badan laga wada maqlay degmooyinka Gobolka Banaadir ayaa la xaqiijiyay inay ka dhalatay Miino lagu aasay Isgooska Banaadir ee magaalada Muqdisho.

Dad goobjoogayaal ah ayaa soo sheegaya in miinada ay qaraxday xili goobta ay aheyd mid aad u mashquul badan, waxaana ka dhashay khasaaro kala duwan.

Goobjoogayaasha ayaa sheegaya in ilaa afar qof ay ku dhaawacmeen Qaraxa, kuwaa oo xiliga Qaraxa maraayay goobta lagu aasay oo aheyd dhinaca  laamiga.

Dadka ku dhaawacmay Qaraxa ayaa waxaa ku jiray arday dhiganeysay Jaamacad ku taalay Isgooska gaar ahaan wadada gasha Isbitaal Digfeer waxaana dhammaan dhaawacyada goobta ka qaaday ciidamada amaanka.

Dad ku nafwaayay ayaa sidoo kale lasoo sheegayaa Qaraxa oo aad u xooganaa, wallow tirada ay tahay mid aan sugneyn.

Goobta uu hadda ka dhacay Qaraxa ayaa marar kala duwan waxaa ka dhacay Qaraxyo kala duwan oo ka dhashay miinada nooca lagu xiro gaadiidka.

Dhinaca kale, Qaraxaani ayaa noqonaaya kii afaraad oo ilaa saaka ka dhacay Muqdisho, waxaana xusid mudan in laba kamid ah Qaraxyada uu ka dhashay miino lagu xiray gawaari.

Caasimada Online

Xafiiska Muqdisho

Caasimada@live.com