Qardho:-Hay’adda Somali Relief Network oo 40-neef oo Ari ah ku soortay carruur Agoonta.

[Deeq A.]

Hay’adda Somali Relief Network North America oo mudo ka badan 27sano ka shaqaynaysay arimaha samafalka iyo gargaarka biniaadantinimo ayaa 40 neef oo ari ah hilibkooda ku soortay caruurta agoonta ah ee dhigata dugsiga Daarul xanaan Qardho, maaamulka dugsiga iyo agoonta halkaas wax ka barata ayaana uga mahadceliyay dadkii samafalayaasha ahaa ee deeqda soorta ah soo gaarsiiyay.

Sheikh Cabdulqaadir Yaasin oo ah maamulka Dugsiga Daarul Xanaan Qardho oo ah xarunta wax lagu baro caruurta agoonta ah ayaa Hay’adda uga mahadceliyey deeqdaan ay ku gargaartay Carruurta, wuxuna sheegay in tani tahay tallaabo ku dayasho leh islamarkana muujinaysa sida masuuliyiinta Hay’addani u dareensan yihiin baahiyaha bulshada taagta yar ee gudaha dalka ku nool.

Guddoomiyaha Hay’adda Somali Relief Network North America Sheikh Aadan Maxamed Ciise Gaadaale oo qado sharaftan khadka telefoonka kaga qayb galay isagoo ku sugan dalka Canada ayaa sheegay iney Hay’ad ahaan xoogga saaran mar walba daryeelka bulshada taagta yar iyo kuwa tabaalaysan ee ku nool gudaha dalka, waxana Sheikh Aadan xusay in Hay’adda sii wadayso howlaha samafalka ee lagu garab istaagayo bulshada taakulaynta u baahan.

Cabdiqaadir Yaasiin oo ah maamulaha guud ee xarunta xanaanaynta agoonta Qardho waxa uu u mahadceliyay dhamaan dadka muxsiniinta eek u midaysan hay’adaan, sidoo kale waxa uu xusay in ay jiraan baahiyo tira badan oo uu dugsigu tabaayo ayna rajaynayaan in ay wax kala soo qabtaan.

Somali Relief Network North America ayaa ah Hay’ad ayku midoobeen dad u heelan gargaarka dadka caawinaadda u baahan ku nool gudaha Soomaaliya, waxana Hay’addo dadaallo badan ku bixisay gacan qabashada kummanaan dad ah oo ay gargaarro noocan ah oo kale ah u fidisay mudadii uu wadanku ku jiray burburka.

Abshir Dhiirane
PUNTLAND POST

The post Qardho:-Hay’adda Somali Relief Network oo 40-neef oo Ari ah ku soortay carruur Agoonta. appeared first on Puntland Post.