Sawirro cajiib ah: Kheyre oo iska bareejeeyay Kim Jong Un-ka Korea-da Waqooyi

[Deeq A.]

Muqdisho (Caasimada Online) – Talaabadani uu qaaday Ra’isul wasaaraha Somalia Xasan Cali Kheyre ayaa ah mid shabaheysa talaabo uu horay u qaaday Hoggaamiyaha Kuuriyada Waqooyiga Kim Jong Un.

Ra’isul wasaare Kheyre ayaa sameeyay qaabkii ilaalada Hoggaamiyaha Kuuriyada ay u garab ordayeen gaadiidkiisa, iyadoo ay noqotay hadal heynta ugu badan ee Baraha Bulshada.

Ra’isul wasaare Kheyre ayaa talaabadani sameeyay xili uu dib uga soo laabtay booqasho uu ku gaaray goobaha ay ku ciidayeen shacabka Soomaliyeed, gaar ahaan Dagmada Dayniile iyo Goobo kale oo kala duwan.

Dharka ay ku labisan yihiin ilaalada garab socta gaadiidka Ra’isul wasaaraha ayaa gabi ahaan ku labisan dharka nooca loo yaqaan Suudka oo sida caadada ah ay isticmaalan ilaalada madaxda.

Kaamirada maanada ayaa Ra’isul wasaare Kheyre ka qaaday sawirkaan xili uu sii galaayay xarunta Villa Somalia, gaar ahaan afafka hore ee qeybta uu kaga shaqeeyo Madaxtooyada.

Kim Jong Un, Hoggaamiyaha Kuuriyada Waqooyi ayaa qudhiisa ceynkaani ku fakiray xili uu la kulmay Madaxweynaha Koofur Kuuriya Moon Jae waxaa kolonyadiisa loo yaqaano Limo dhinac ordayay 12 ka mid ah Ilaaladiisa qaaska ah ee daba ordayay.

Kulankii Kim Jong Un iyo Donald Trump ay ku yeesheen Singapore ayay ka soo muuqdeen, markii uu Kim Jong Un gaaray Singapore, si la mid ah sidii markii uu la kulmayay Madaxweynaha Koofur Kuuriya ay u dhinac ordayeen gaarigiisa.