Beentii AW-MURIIDI iyo gantaalkii nukliyeerka ee Imaaraadka Carabta

[Deeq A.]

Aw-Muriidi subaxaa waxaa uu ka soo toosay xaafadda Cadeyga ee degmada Xamar/weyne isagoo intuu dib u laabtay soo dhexmaray suuqyaraha koodka ee cariiriga ah ee isla x aafadaasi si uu indhaha ugu soo nuursado bajiyaha. Dhangalowga, isbaandheeska , leefleefowga iyo kalluunka.

Wuxuu ka soo leexday dhinaca masjidka ———- wuxuuna ku soo beegmay luuqyada cabdalla shideeya iyo hooshaanka oo uu kaga soo dhacay hotel Maleyka iyo dukaamada , harqaamada iyo goobaha jumlada.

“Shib shib waaye magaalada”..maanta yaa ka roon ayuu hoos iskula hadlay wuxuuna sii raaciyey “ Maanta mala fool baxsanin” oo ahaa eray uu kuu isticmaali jiray maalmaha degan ee aan magaalada wax qarax ah ka dhicin.

Wuxuu markii dambe ku leexday dawaarlaha Qalloocow oo uu maamulayey nin ay saaxiib ahaayeen.

Mid ka mid ah kuraasta fadhiga ayuu ku fariistay..waxaaa hore u joogay shariif Cali oo loo yaqaano Shariif Maamow oo ay isku da’ahaayeen.

“Duqii waa baxay lee ma ahoo “ ayuu Maamow ku yiri Aw-Muriidi, kolkaas ayuu Muriidi ku jawaaabay “Wax la suubiyey ayaa o ghee…lacag maa la bixiyey ..yaa og….Duqa waa jiitay lee maqalnay”.

Sheekadii markii ay muddo socotay Aw-Muriidi sidii caadada u aheyd isagoo fadhiya ayuu is gashaday…waa kan hurday ..oo quuriyey.

Shariif Maamow yaab ayaa ka soo haray isagoo leh “Muriidi saan lee maas ahaay…meeshiis tagabo ma ku hurdaa lee …ayaan dhaweyd Masjidka marwaas aas ku hurday…maalin kale dukaanka Deqqow ee via Rooma, meel walbo ma lagu quurinaa…horta usuga habeenkii ma hurdo miyaa”.

Intii wiilka harqaanka joogay iyo shariifka ay hadalka hayeen ayuu misana Aw-Muriidi qeyliyey markii uu riyooday.

Wuxuu ku riyooday isagoo joogay garoonka diyaardaha Aaden Cadde oo ay ka ambabaxeysay diyaarad ay raacayyeen sakaakiil Imaaraadka ah oo u socday dalkooda …
Muran baa dhacay saraakiisha garoonka iyo kuwa imaaradka waxaana ay saraakiisha soomaalida ku adkeysteen in ay baaraan diyaardda intia aaney duulin ka hor.

Diyaaradda waxaa saaran gantaal Nukliyeer ah oo ay Imaaraadku hore qarsoodi dalka u keeneen hadana ay la noqonayaan….yaab baa dhacay.

Askarigii ugu horreeyey markii u diyaaradda madaxa galiyey ayuu sarkaal imaaraadka ah oo gudaha ku sugnaa gantaalkii keebka u qabtay oo qarxiyey…

Mar qura ayaa wixii oo dhan qiiq iyo olol isu rogeen ..Aw-Muriidi oo ka mid ahaa dadkii agagaarka ka dhowaa wax holcaya ayaa ku dhegay.

Aw-Muriidi waa galgashay isagoo holcaya oo qeylinaya ….” Waa dhintay…..iga fujiya” ayuu ku qeyliyey.

Shariifka yaab ayaa ka soo haray “Maxaa ku dheggan waaba hurdooyaaye…..maskiin cabsi lee miyaa waxaas “ ayuu yiri ka dibna wuxuu bilaabay in uu toosiyo “Muriidi ka kacbo….hana murjinine..yaa kuugu dhegan” ayuuna weydiiyey.

Aw- Mudiiri isagoo neeftuuraya ayuu hurdo-fadhigii ka toosay wuxuu yiri isagoo riyadiisa ka beensheegay “Waxaan ku riyooday anigoo jooga Warta-Nabadda..oo faraxsan oo iska lugeynaayo..amba iska lugeeyee meel fiican ma mareynin ..luuq luuq aas ahaay…waqti labo saac habeen camal eh…meel dameero badan joogaan aan soo maray…..waa naxay ..mugdi ay aheyd ..laakiin waa iska tawakalay ..yacni waa iska sii socday….lamo dameer ayaa isoo dabo kacday…gadaalba ma iska fiirinin…..mid hortey ayuu markii dambe socday midna gadaal aas iga xigay..kii horteyda socdi haraanti lees igu bilaabay..markii boodayna kii kale aa haraati igu qaadqaaday waa isu key dhiidhiibeen…dhulkaan ku dhacay waa igu joogjoogsadeen”

W/Q: Mohamed Shiil