Daawo: Nin Soomaali ah oo weerar ku qaaday masjid oo lagu toogtay Cape Town

[Deeq A.]

Cape Town (Caasimada Online) – Waxaa warar dheeraad ah laga helayaa nin Somali ah oo weerar loo adeegsaday Mindi ku qaaday Maasjid ku yaalla Magaalada Cape Town ee dalka Koonfur Afrika.

Khasaaraha ka dhashay weerarkan ayay Boolisku ku sheegeen in ay ku dhinteen laba qof, iyada oo ay ku dhaawacmeen ilaa Saddex ruux oo la dhigay mid ka mid ah isbitaalada ku yaalla magaalada Cape Town.

Saraakiisha Booliska oo arrintan baaritaano ku haya ayaa waxa ay sheegeen in falkan uu dhacay waxyar kadib Salaada Tahjudka, waxay kaloo Boolisku tilmaameen ninka weerarka geystay in madaxa looga jiray ama uu qabay xanuunka dhimirka.

Ninka Somaliga ayaa la sheegay in uu muddo ku noolaa dalkaasi, islamarkaana mar uu ka mid ahaan jiray Ganacsatadda Somaliyed ee halkaasi ku nool.

Ciidamada Booliska ayaa markii dambe toogtay ninka ku hubeysnaa tooreyda, kaddib markii uu isku dayay inuu soo weeraro.

Dhacdadan ayaa waxaa aad u hadal haya jaaliyadda Somaliyed ee ku nool dalkaasi, waxayna tilmaameen in arrintan ay ku noqotay layaab.

Caasimada Online
Xafiiska Cape Town
Caasimada@live.com