Xog: Michael Keating oo ku fashilmay xalinta colaada Somaliland iyo Puntland

[Deeq A.]

Muqdisho (Caasimada Online) – Ergayga gaarka ah ee Qaramada Midoobay u qaabilsan Somalia Micheal Keating, ayaa sheegay inay dhibeyso colaada u dhexeysa Somaliland iyo Puntland.

Keating, waxa uu tilmaamay in QM ay weli ku guda jirto xal u raadinta colaada labada dhan ee kataagan deeganka Tukaraq ee Gobolka Sool.

Keating, waxa uu sheegay in labada maamul ay kala hadleen dagaalka, hase ahaatee aanu weli hirgalin dadaalka labada dhinac ciidamadooda looga saari lahaa Tukaraq.

‘’Dadaalkeenu wuu socdaa waxaa jira isfahano yaryar oo aan xalkeeda ku guda jirno si looga gudbo dagaalka dhiiga ku daatay ee ka socda Tukaraq’’

Waxa uu Keating intaa raaciyay ‘’Walwal ayan ka qabaa xiisada Somaliland iyo Puntland ee Tukaraq, waanan ka wada xaajoonay, waxaanu waliba ka wada hadalnay xasiloonida guud gaar ahaana Puntland hadana ma muuqdo xalka dagaalka,”

QM ayuu sheegay in labada dhinac ay ku qancineyso xaqiiqda dagaalka iyo dhibta ka dhalankarta haddii uu sii socdo, waxa uuna cadeeyay in labada maamul ay ballanqaadyo aan sal laheyn u sameeyen QM.

Sidoo kale, Keating ayaa dowlada Somalia ugu baaqay inay qaado talaabo saldhig u noqonkarta xasiloonida Sool, maadaama ay mas’uuliyad ka saaran tahay dhiiga qubanaaya.

Haddalka Keating, ayaa u muuqanaaya mid raja beel ku ah xalinta colaada deegaanka Tukaraq, waxaana laga dheehankaraa in QM ay ku dhex wareersan tahay dagaalka.

Caasimada Online

Xafiiska Muqdisho

Caasimada@live.com