Sawir: Muxuu Axmed Madoobe kusoo arkay Deegaanadii Shabaab laga qabsaday ee Duleedka Kismaayo

[Deeq A.]

Kismaayo (Caasimada Online)-Hoggaamiyaha maamulka Jubbaland Axmed Madoobe  ayaa booqday deegaanada gosha oo ay howlgal ka bilaawen ciidamada Jubbaland iyo kuwa xooga Dalka halkaas oo lagu wiiqay awooda Al-Shabaab.

Hoggaamiyuhu waxa uu tagay dhamaan deegaanadii ugu danbeeyay ee laga saaray maleeshiyaadka Al-Shabaab, waxa uuna ciidamada ku booriyay in ay u dhabar adeegan howlgalka ka dhanka ah Al-Shabaab.

Hoggaamiyuhu waxa uu isla deegaanadaasi kulan kula qaatay Sarakiisha howlgalka hogaaminaysa isagoo amaanay sida ay howsha u wadaan.

Waxa uu Madoobe sheegay in wax walba oo taakulo ah loo dhamaystiray ciidamada isla markaana hadda ay si hagar la’aan ah u gudanayaan howshii loo igmaday.

Saraakiisha ciidamada ayuu faray inay ka fogaadan waxyaabaha niyad jabinkara ciidamada dagaalka kula jira Al-Shabaab.

Sidoo kale, Axmed Madoobe ayaa deegaanadaasi kusoo arkay goobo dhowr ah oo ay gubeen maleeshiyaadka Al-Shabaab, halkaa oo saldhig u aheyd ciidamada iyo guryo ay ku noolaayen dad shacab ah.

Si Kastaba, Jubaland ayaa dagaal xoogan kula jirta Shabaabka ku sugan Duleedka Kismaayo, iyadoo Jimcihii weerar xoogan oo ka dhacay Deegaanka Baar Sanguuni lagu dilay askari Mareykan ah iyo 4 Somali ah, Waxaana weerarkaas ku dhaawacmay 4 Askari oo Mareykan ah.

Caasimada Online

Xafiiska Kismaayo

Caasimada@live.com