Al-Shabaab oo caawa weerar culus ku qaaday fariisimo ay ciidamada NISA ku leeyihiin Siinka-dheer

[Deeq A.]

Muqdisho (Caasimada Online)-War goordhow nasoo gaaray ayaa sheegaya in dagaal culus uu caawa ka dhacay deegaanka Siinka-dheer ee duleedka magaalada Muqdisho.

Dagaalka ayaa yimid kadib markii maleeshiyada al-Shabaab ay weerar dhowr jiho ah ku qaaden ciidamada NISA ee ka howlgala Siinka-dheer.

Dadka deegaanka ayaa soo sheegaya in dagaalka uu socday ku dhawaad saacad iyo bar, isla markaana leysu adeegsaday Hubka noocyadiisa kala duwan, kaa oo uu ka dhashay khasaaro kala duwan.

Dagaalka ayaa la xaqiijiyay inuu ka dhashay khasaaro dhimasho iyo dhaawacba leh, iyadoo dhimashada lasoo sheegayo inay gaareyso ilaa Lix oo labada dhinac ah.

Dhaawaca ayaa sidoo kale gaaraya ilaa Shan oo labada dhinac ah, sida laga soo xigtay goobjoogayaal.

Ciidamada Dowlada ayaa iska caabiyay maleeshiyaadka duulaanka kusoo qaaday, iyadoo markii danbe laga saaray xeendaabka halka uu dagaalka ka dhacay.

Geesta kale, ciidamada ayaa weerarka kadib gudaha u galay xaafadaha Siinka-dheer oo ay ka sameynayaan howlgal lagu baadi goobayo maleeshiyaadka weerarka qaaday.

Caasimada Online

Xafiiska Muqdisho

Caasimada@live.com