Feysal Waraabe oo shaaciyay in shirka Baydhabo lagu ansixiyay halis cusub oo loo maleegayo Somaliland

[Deeq A.]

Muqdisho (Caasimada Online)-Guddoomiyaha Xisbiga mucaaradka UCID ee Maamulka Soomaaliland Eng Feysal Cali Waraabe ayaa shaaca ka qaaday in shirka Amniga Qaranka ee kusoo xirmay magaalada Baydhabo lagu ansixiyay in Puntland lasiiyo Hub.

Feysal Cali Waraabe, waxa uu sheegay in shirkaasi ujeedkiisa uu ahaa in awood saanad lagu siiyo Puntland oo dagaal kula jirta Somaliland, sida uu hadalka u dhigay.

Feysal Cali Waraabe, waxa uu tilmaamay in shirka Baydhabo uu magaca guud ka ahaa shir amni, hase yeeshee ujeedka qarsoon uu ahaa in go’aan laga gaaro sida Puntland lagu siin lahaa Hub ayuu yiri.

Feysal Cali Waraabe, waxa uu ku celcelshay in shirkii Amniga Qaranka ee Madaxda Dowladda iyo kuwa Maamul goboleedayda lagu go’aamiyey in Puntland mar kale Hub loo raro.

Feysal Cali Waraabe, oo shirka Baydhabo kadib shir Jaraa’id ku qabtay magaalada Hargeysa ayaa sheegay in adduunka ay u gudbin doonaan in dowlada Somalia iyo maamul Goboleedyada ku heshiiyeen in Puntland lagu taageero dhibaateynta Somaliland.

Feysal Cali Waraabe, waxa uu sheegay in Somaliland aysan afka ka qabsan doonin dhibaato uu sheegay in dowlada Somalia ay u maleegeyso Somaliland, waxa uuna cadeeyay in shirka Baydhabo ay ka aaminsan yihiin halis cusub.

Feysal Cali Waraabe, waxa uu sheegay in dowladda Somalia ay dabada ka riixeyso maamulka Puntland, isla markaana Puntland lasiinayo hub iyo ciidan, sidoo kalena Puntland la geynayo Ciidamada AMISOM sida uu hadalka u dhigay.

Sidoo kale, waxa uu sheegay in Maamulka Puntland ay QM u gudbisay dacwad ka dhan ah Somaliland, gaar ahaan,iyaga oo ku andacoonaya in Gobolka Sool ay iyagu leeyihiin.

Haddalka Feysal Cali Waraabe, ayaa u muuqanaaya mid lagu hurinaayo Colaada ka dhex aloolsan maamulada Puntland iyo Somaliland.

Caasimada Online

Xafiiska Muqdisho

Caasimada@live.com