Sawirro: Ciidamada Danab oo burburiyay Saldhigyo ay leeyihiin al-Shabaab

[Deeq A.]

Kismaayo (Caasimada Online)-Dhaqdhaqaaqyo ciidan iyo howlgalo ayaa waxa uu ka socdaa degaano dhowr ah oo ka tirsan Gobolada Jubbooyinka.

Dhaqdhaqaaqa iyo howlgalada ayaa waxaa wada Ciidanka sida gaarka ah u tababaran ee Danab kana tirsan Xoogga dalka Soomaaliyeed.

Dhaqdhaqaaqa iyo howlgalka ayaa si gaara uga socda deegaanada Jammaame, Kaban iyo Kamsuuma iyo deegaano kale oo dhowr ah.

Ciidamada ayaa deegaanada qaar ku burburiyay ilaa afar fariisimo oo ay lahaayen al-Shabaab, waxa ayna kusii jeedan Saldhigyo kale oo ay leeyihiin Shabaab.

Inta uu howlgalka socdo ayey gacanta kusoo dhigeen ku dhawaad 15 ilaa 25 qof oo la xiriirinayo inay ka mid yihiin Shabaab, iyaggoo  baaris ku wada, si loo kala saaro.

General Ismaaciil Saxardiid oo ah Taliyaha qeybta 43-aad ee ciidanka xoogga dalka ayaa sheegay in howlgalada hordhaca ah ay ku guuleysteen hadana ay socdaan howlgalo kale.

Waxa uu intaa raaciyay in howlgalada ay si wadajir ah ay u fuliyeen Ciidanka gaarka ah ee Danab oo gacan ka helaya Kuwa Mareykanka.