Sidee ayuu Axmed Madoobe u arkaa shirkii Golaha Amniga ee kusoo dhamaaday Baydhabo?

[Deeq A.]

Kismaayo (Caasimada Online)-Hogaamiyaha maamulka Jubbaland Axmed Madoobe ayaa markii ugu horeysay ka hadlay qodobadii ka soo baxay shirkii Golaha Amniga ay ku yeesheen Magaalada Baydhabo.

Axmed Madoobe ayaa sheegay in shirka uu ahaa mid ahmiyad gaara u leh guud ahaan Somalia, waxa uuna cadeeyay inuu kusoo dhamaaday guul, sida uu hadalka u dhigay.

Waxa uu Hoggaamiye Axmed Madoobe sheegay in ay muhiim tahay in la dhaqan geliyo dhammaan qodobadii ka soo baxay Shirka loona baahan yahay in dhamaan madaxda dowladdda iyo kuwa dowlad goboleedyada ay ka shaqeeyaan dhaqan gelintooda.

‘’Shirka waxa uu kusoo dhamaaday guul, waxaan is leeyahay nasiib daro waxa ay dhaceysaa marka laga weecdo qodobada aan gacanteena ku xariiqnay’’

‘’Waxaan ku baaqeynaa in si rasmi ah loo dhaqan galiyo qodobada, waayo shirka waxaa ahmiyadiisa la arki karaa marka lagu shaqeeyo wixii kasoo baxay’’

Axmed Madoobe, waxa uu sidoo kale sheegay inay muhiim tahay in la xoojiyo qodobada amniga iyo Siyaasada oo uu ku sheegay in ay ahaayeen qodobadii ugu muhiimsanaa ee Shirka ka soo baxay.

Sidoo kale, Madoobe ayaa ku baaqay in laga wada shaqeeyo sidii loo heli lahaa Xasilooni Siyaasadeed iyo midnimada umadda Soomaaliyeed.

Dhinacakale, haddalka ayaa imaanaya ka dib markii uu maanta dib ugu laabtay Magaalada Kismaayo isaga oo ka soo laabtay Magaalada Baydhabo oo lagu soo gabagabeeyay shirkii Golaha Amniga Qaranka.

Caasimada Online

Xafiiska Kismaayo

Caasimada@live.com