Madax ka tirsan DFS iyo Beesha caalamka oo ku wajahan Baydhabo & Amniga oo aad loo adkeeyay (Ujeedka)

[Deeq A.]

Baydhabo (Caasimada Online)-Waxaa aad loo adkeeyay amniga guud magaalada Baydhabo ee xarunta gobolka Bay, kadib markii ciidamo aan horay loo arag lagu daadiyay waddooyinka magaalada.

Gudaha magaalada iyo daafaha ayaa waxaa lagu arkayaa ciidamo dhulka daadsan iyo kuwo dusha ka saaran gaadiidka dagaalka oo ka qeybqaadanaaya amniga.

Magaalada Baydhabo ee xarunta gobolka Bay ayaa maanta waxaa ku wajahan wafdi ka kala socda dowladda Federaalka, maamul goboleedyadda iyo Beesha caalamka.

Magaalada Baydhabo ayaa waxaa lagu wadaa in uu ka furmo Shirka Golaha Amniga Qaranka, oo ay ka qeybgalaayaan madaxda maamul goboleedyada, kuwa dowladda Soomaaliya iyo Beesha Caalamka.

Ciidanka AMISOM ayaa la wareegay ammaanka halka shirka uu ka dhacayo, iyadoo fariisimo ka sameystay banaanka xarunta shirka.

Shirka ayaa lagu waddaa in lagu soo bandhigo qorshaha Qaranka ee ku wahahan dhanka Ammaanka, waxaana laga soo saari doonaa qodobo lagu xoojin doono amniga dalka.

Sidoo kale, Wasiirada amniga ayaa halkaa ka jeedin doona khudbado kooban oo lagu darsaayo sida loo wajahay amniga iyo waxyaabaha dheeriga ah ee la doonaayo.

Dhinaca kale, Shirkaan ayaa daba socda shirar amni oo dhowr ah kuwaa oo intooda badan ka dhacay magaalada Baydhabo.

Caasimada Online

Xafiiska Baydhabo

Caasimada@live.com