Al-Shabaab la wareegtay degmo muhiim ah kadib dagaal culus oo dhacay

[Deeq A.]

Muqdisho (Caasimada Online) – Wararka nagasoo gaaraya degmada Moqokori ee gobolka Hiiraan ayaa waxa ay sheegayaan in dagaal culus uu halkaasi ku dhex maray Al-Shabaab iyo ciidamada dowladda Somalia.

Dagaalka ayaa yimaaday kadib markii dagaalyahano aad u hubeysan oo ka tirsan Al-Shabaab ay weerarku qaadeen degmada oo ay ku sugnaayeen ciidamada dowladda Somalia.

Al-Shabaab ayaa sheegtay inay la wareegtay degmada Moqokori isla markaana dagaal culus oo halkaasi ka dhacay ay uga itaal roonaatay ciidamada dowladda Somalia ee degmadaasi ku sugnaa.

Dadka deegaanka ayaa sheegay in dagaalka uu socday ku dhawaad saacad isla markaana la isku adeegsaday hubka nuucyadiisa kala duwan.

Al-Shabaab war ay ku qortay bogagga taageera waxa ay sidoo kale ku sheegtay in ay dagaalka ku qabsatay sadex gaari oo laba ay yihiin nooca raaxada halka midka kale uu yahay gaari nooca qaada ciidamada.

Al-Shaabab waxa ay sidoo kale sheegtay inay dagaalka ku qabsatay hub farabadan oo ay lahaayeen ciidamada dowladda ee degmada laga qabsaday.